ऑगस्टपासून मध्य रेल्वेचं नवं टाईमटेबल, प्रवाशांना दिलासा, रोज १० दादर लोकल

प्रतिनिधी, मुंबई : छत्रपती शिवाजी महाराज टर्मिनसमधून सुटणाऱ्या लोकलमध्ये दादर स्थानकात प्रवेश करता येत नसल्याच्या तक्रारीची दखल घेत मध्य रेल्वेने मुंबई उपनगरी रेल्वेच्या नव्या वेळापत्रकाची आखणी केली आहे. दादर स्थानकातून १० लोकल फेऱ्या सुरू करण्याचा निर्णय रेल्वे प्रशासनाने घेतला आहे. तसेच, परळ स्थानकातून अतिरिक्त २४ फेऱ्या सुरू होणार आहेत. ऑगस्टच्या पहिल्या आठवड्यात नवे वेळापत्रक लागू होणार आहे. दादर येथील ११ क्रमांकाच्या नव्या फलाटाचा अधिक वापर व्हावा, यासाठी सीएसएमटीहून सुटणाऱ्या १० फेऱ्या दादर स्थानकातून चालवण्यात येणार आहेत. यात ५ अप आणि ५ डाउन लोकलचा समावेश आहे.

नवीन वेळापत्रक ऑगस्टपासून

मध्य रेल्वेच्या उपनगरी मार्गावरील गाड्यांचे नवीन वेळापत्रक ऑगस्टपासून लागू होणार असून, नव्या लोकल फेऱ्या चालवण्यासाठी जागा उपलब्ध नसल्याने नवीन वेळापत्रकात कोणत्याही नव्या लोकल फेऱ्यांचा समावेश करण्यात आलेला नाही. मात्र, दादर-परळमधून सुरू होणाऱ्या लोकल फेऱ्यांमुळे प्रवाशांना दिलासा मिळेल, असा विश्वास रेल्वे अधिकाऱ्यांकडून व्यक्त होत आहे. दादरमधील फलाट क्रमांक १०चे दुतर्फीकरण झाले आहे. यामुळे जलद लोकलमध्ये दोन्ही बाजूने ये-जा करण्याचा पर्याय उपलब्ध झाला आहे.
Ladka Bhau Yojana : लाडकी बहीणनंतर भाऊरायांसाठी मुख्यमंत्र्यांची योजना, दरमहा १० हजार मिळणार, पंढरपुरातून घोषणा

परळहून २४ धीम्या लोकल

दादर रेल्वे स्थानकातील फलाट क्रमांक आठचे रुंदीकरण झाल्याने दादर स्थानकातून सुरू होणाऱ्या २४ धीम्या लोकल फेऱ्या परळ स्थानकातून चालवण्यात येणार आहेत. सध्या परळ स्थानकातून २२ फेऱ्या सुटत असल्याने परळहून सुटणाऱ्या फेऱ्यांची एकूण संख्या ४६ वर पोहोचणार आहे. कसारा-कर्जतहून येणाऱ्या लोकलमधील बहुतांश प्रवासी दादर स्थानकात उतरतात. तसेच दादर स्थानकातून लोकलमध्ये प्रवेश करणाऱ्यांची संख्याही अधिक आहे. दादर स्थानकातून लोकल सुरू केल्यामुळे सीएसएमटी ते दादर स्थानकातील रेल्वेगाड्यांची खोळंबा टाळण्यास मदत होणार असून यामुळे वक्तशीरपणा सुधारण्यास मदत होईल, असा आशावाद रेल्वे अधिकाऱ्यांनी व्यक्त केला आहे.

फलाट क्रमांक १० दुतर्फा केल्यामुळे दादर स्थानकातील मेल-एक्स्प्रेसचे संचालन अधिक सोपे झाले आहे. एका मेल-एक्स्प्रेसमागे सुमारे एक ते दोन मिनिटांचा वेळ वाचणार आहे. यामुळे दादर ते कल्याण दिशेने लोकल चालवण्यासाठी जागा उपलब्ध झाल्याने दादर स्थानकातून लोकल चालवण्याचा आणि दादर स्थानकात लोकल थांबवण्याचा निर्णय घेतला आहे.

ठाणे-कल्याण जादा लोकल

कळवा आणि मुंब्रामधील रेल्वे प्रवाशांना नव्या वेळापत्रकात दिलासा मिळणार आहे. सकाळी आणि सायंकाळी गर्दीच्या वेळेत एका अतिरिक्त लोकलला थांबा देण्यात आला आहे. ठाणे स्थानकापर्यंत धावणाऱ्या सहा लोकल कल्याणपर्यंत विस्तार करण्यात येणार असल्याने दिवा, डोंबिवली, कल्याणमधील प्रवाशांनाही त्याचा लाभ मिळणार आहे.
Mumbai Metro 3 : पहिली अंडरग्राऊण्ड मुंबई मेट्रो पुढच्या आठवड्यात सुरु, तावडे म्हणतात हीच मोदी गॅरंटी

आकड्यांवर नजर (मध्य रेल्वे)

फेऱ्या
मुंबई उपनगरी रेल्वे फेऱ्या १,८१०
मुख्य मार्ग एकूण फेऱ्या ८९४
धीम्या फेऱ्या ६२३
जलद फेऱ्या २७१
वातानुकूलित फेऱ्या ६६

लोकल गाड्या
१५ डबा विनावातानुकूलित २
१२ डबा वातानुकूलित ५
१२ डबा विनावातानुकूलित ७४
एकूण ८१