मनसेप्रमुख राज ठाकरे यांनी गुढी पाडवा मेळाव्यातून केवळ पंतप्रधान नरेंद्र मोदींसाठी लोकसभा निवडणुकीत भाजपला बिनशर्त पाठिंबा देत असल्याचे जाहीर केले. त्यानंतर, मनसेच्या पदाधिकारी कार्यकर्त्यांनी महायुतीच्या उमेदवाराच्या प्रचारार्थ कामही सुरू केले आहे. आज उमेदवारी जाहीर झाल्यानंतर लगोलग कल्याण आणि ठाणे मतदारसंघातील श्रीकांत शिंदे आणि नरेश म्हस्के यांनी राज ठाकरे यांची भेट घेतली.
महायुतीच्या उमेदवारांना त्यांच्या निवडणुकीकरिता शुभेच्छा दिल्या, असे राज यांनी भेटीनंतर सांगितले. तर महायुतीच्या उमेदवारांच्या समर्थनार्थ राज ठाकरे यांच्या सभा होतील, असे श्रीकांत शिंदे यांनी सांगितले.
केंद्रीय मंत्री तथा रत्नागिरी सिंधुदुर्ग लोकसभेचे उमेदवार नारायण राणे यांच्या समर्थनार्थ राज ठाकरे प्रचार सभा घेणार आहेत. ४ मे रोजी ५ वाजता राज यांची कणकवलीत जाहीर सभा होणार आहे. ठाण्यात शिंदेसेनेचे नरेश म्हस्के यांच्याविरोधात ठाकरे यांच्या शिवसेनेच्या राजन विचारेंचे आव्हान असणार आहे तर कल्याणमधून श्रीकांत शिंदे यांच्या विरोधात ठाकरे गटाच्या वैशाली दरेकर यांचे आव्हान असणार आहे.