नाशिक लोकसभा मतदारसंघातून निवडणूक लढवण्याची भुजबळांची इच्छा होती. इथे शिंदेसेनेचे हेमंत गोडसे खासदार असल्यानं पेच वाढला. जागावाटपाचा तिढा बरेच दिवस कायम राहिल्यानं अखेर छगन भुजबळांनी माघार घेतली आणि नाशिकच्या जागेवरील दावा सोडला. त्यांनी घेतलेल्या पत्रकार परिषद घेत ही घोषणा केली. केंद्रीय गृहमंत्री अमित शहा आपल्या नावाबद्दल आग्रही होते. पण मित्रपक्षाची जागा असल्यानं, त्यांचा दावा असल्यानं तिढा वाढत गेला, असं भुजबळ म्हणाले होते.
शिंदेसेनेमुळे आपल्याला लोकसभेची उमेदवारी मिळाली नाही याची बोच भुजबळांच्या मनात आहे. तेव्हापासूनच भुजबळांचं भाजप आणि शिंदेसेनेसोबदत फिस्कटलं आहे. भुजबळांची नाशिकमध्ये मोठी यंत्रणा आहे. पण लोकसभा निवडणुकीत ती फारशी सक्रिय नव्हती. भाजपचे संकटमोचक गिरीश महाजन भुजबळांना भेटून गेले. तरीही त्यांची नाराजी कायम राहिली. भुजबळांनी नाशिक, दिंडोरीत फारसं लक्ष घातलं नाही. त्यामुळे शिंदेसेना आणि भाजपचे उमेदवार अडचणीत आले. नाशिकमध्ये मुख्यमंत्री शिंदेंना जातीनं लक्ष घालावं लागलं.
Pune Car Accident: अजितदादांचा आयुक्तांना फोन, गोष्टी मॅनेज; पोर्शे प्रकरणात ससूनच्या डॉक्टरचा खळबळजनक दावा
४०० पार, भाजपवर अप्रत्यक्ष वार
भाजपचा ४०० पारचा नारा निवडणुकीत अंगाशी आला, असं म्हणत भुजबळांनी मित्रपक्षावर संधान साधलं. विधानसभेला राष्ट्रवादी काँग्रेसला ८० ते ९० जागा हव्यात. लोकसभेसारखी खटपट त्यावेळी नको, असं म्हणत त्यांनी भाजपला शिंगावर घेतलं. भाजपचे आमदार राम कदमांनी घाटकोपर होर्डिंग प्रकरणावरुन होर्डिंग कंपनीचा मालक भावेश भिंडेचा उद्धव ठाकरेंसोबतचा फोटो सोशल मीडियावर शेअर केला. ठाकरेंवर टीका केली. त्यावर सरकार आमचं, पालिका आमचीच, मग उद्धव ठाकरेंचा संबंध काय, असा प्रश्न भुजबळांनी केला.
आव्हाडांच्या मदतीला धावले भुजबळ
शरद पवार गटाचे आमदार जितेंद्र आव्हाड यांच्याकडून डॉ. बाबासाहेब आंबेडकरांचा फोटो फाडला गेला. त्यावरुन भाजपनं आव्हाडांविरोधात रान उठवलं. भाजप नेते आव्हाडांवर टिकेची झोड उठवत असताना भुजबळ त्यांच्या बचावासाठी धावले. विशेष म्हणजे अजित पवार गटदेखील आव्हाडांविरोधात आंदोलन करत असनाता त्याच गटात असलेल्या भुजबळांनी मात्र आव्हाडांची पाठराखण केली.