आरोप सिद्ध होईपर्यंत निर्दोषच, ठाकरेंना सोडल्याचा पश्चाताप नाही, यामिनी जाधव यांच्या भावना

मुंबई : ‘मी नगरसेवकपदापासून कामाला सुरुवात केली असून आता आमदार म्हणून जनतेच्या प्रश्नांची सोडवणूक करत आहे. माझ्या मतदारसंघातील सर्वधर्मीय आणि जातीय मतदारांचा मला पाठिंबा आहे. माझ्याकडे सक्षम उमेदवार म्हणून पाहिले जात आहे. त्यामुळे आगामी निवडणुकीत मला मतदारांची पसंती लाभेल आणि ते निवडून देतील’, असा विश्वास दक्षिण मुंबईतील महायुतीच्या उमेदवार यामिनी जाधव यांनी शुक्रवारी व्यक्त केला. आमच्यावरील आरोप जोपर्यंत ते सिद्ध होत नाहीत, तोपर्यंत आम्ही निर्दोषच आहोत, असेही त्यांनी यावेळी स्पष्ट केले.

‘महाराष्ट्र टाइम्स’ आयोजित ‘मटा कट्टा’ या चर्चेदरम्यान यामिनी जाधव यांनी दक्षिण मुंबई मतदारसंघातील त्यांची उमेदवारी, मतदारसंघातील विविध प्रश्न यावर मोकळेपणाने संवाद साधला. ‘पक्षाने जरी उमेदवारी उशिरा घोषित केली असली तरीही कार्यकर्ता म्हणून आम्ही निवडणुकीची तयारी करत होतो. ज्या दिवशी मला उमेदवारी घोषित झाली, तेव्हापासून कामाला सुरुवात केली. पहिल्या दिवसापासून आम्हाला सकारात्मक प्रतिसाद मिळत आहे’, असे जाधव यांनी अधोरेखित केले.

‘दक्षिण मुंबई मतदारसंघात मोडकळीस आलेल्या चाळी, इमारती यांच्या पुनर्विकासाचा मुद्दा कळीचा आहे. दक्षिण मुंबईत ८० ते १०० वर्षे जुनी बांधकामे आहेत. अनेक ठिकाणी कुठे रहिवासी तर कुठे मालकांमुळे पुनर्विकासात अडथळा निर्माण झाला आहे. यात व्यावसायिक वापराच्याही इमारती आहेत. परंतु, गृहनिर्माण धोरणातील बदलामुळे याला नक्कीच चालना मिळेल’, असे आश्वासन जाधव यांनी दिले. मुंबई पोर्ट ट्रस्टच्या जमिनींचा प्रश्न खूप जुना असून त्यावर लवकरात लवकर तोडगा निघण्याची गरज जाधव यांनी व्यक्त केली. या जागांचा विकास करण्यासाठी सर्वसमावेशक धोरण करण्यात येत आहे. त्यामुळे या जागांवरील रहिवाशांचे प्रश्न लवकरात लवकर सुटतील, असेही जाधव यांनी स्पष्ट केले.
जेल की पक्षबदल, दोनच मार्ग होते, पत्नीलाही गोवल्याने जड अंतःकरणाने निर्णय, नियतीने ही वेळ कुणावर आणू नये, वायकर व्याकुळ
‘मुंबईत मराठी-गुजराती हा वाद कधीच नव्हता. हे शहर नेहमीच कॉस्मोपॉलिटन राहिले आहे. गिरगावातील मराठी माणूस टिकावा म्हणून मेट्रोमुळे विस्थापित होणाऱ्या मराठी माणसांना गिरगावातच घर मिळावे, यासाठी मुख्यमंत्री एकनाथ शिंदे प्रयत्नशील आहेत. त्यांच्यासाठी ठाम भूमिका त्यांनी घेतली आहे’, असा दावाही जाधव यांनी केला.

उमेदवारी उशिरा जाहीर झाल्याचा कितपत फटका बसेल, याविषयी बोलताना जाधव यांनी आपल्याला सर्व समाजांतून पाठिंबा असल्याचे स्पष्ट केले. ‘माझी उमेदवारी उशिरा जाहीर झाली तरीही मी एक विद्यमान आमदार आहे. दक्षिण मुंबईत दलित, मुस्लिम, गुजराती, मारवाडी अशा सर्व समाजांतून मला पाठिंबा आहे. जनता माझ्याकडे एक सक्षम उमेदवार म्हणून पाहत आहे’, असे जाधव यांनी स्पष्ट केले. २०१९च्या विधानसभा निवडणुकीत मला मुस्लीम समाजाने भरभरून मतदान केले होते. सर्व समाजाने मला मतदान केले नसते तर २० हजारांहून अधिकचे मताधिक्य मला मिळालेच नसते, असेही त्या म्हणाल्या.
Raj Thackeray : काँग्रेससाठी मशिदींतून फतवे, पुण्यातील हिंदूंनी भाजपला मत द्यावं, राज ठाकरेंची साद

‘निर्णयाचा पश्चाताप नाही’

‘एकनाथ शिंदे यांना पाठिंबा देण्यासाठी माझ्यावर कुणाचाही दबाव नव्हता. मला उद्धव ठाकरे यांचा पक्ष सोडल्याबद्दल कुठलाही पश्चात्ताप नाही. मी गद्दारी नाही तर नेतृत्वाच्या विरोधात बंड केले. शिवसेना अशा नेतृत्वाखाली होती, जी लोकांच्या अडचणी समजून घेत नाही. रस्त्यावर उतरणाऱ्या कार्यकर्त्यांबद्दल त्यांना कणव नाही. कार्यकर्त्यांना पाठ दाखविणाऱ्या, त्यांच्यावर संकट आल्यावर तुमची लढाई तुम्ही लढा, असा सल्ला देणाऱ्या नेतृत्वासोबत राहण्यात मला रस नव्हता’, असेही त्या म्हणाल्या. करोनामध्ये ज्यांनी शहरासाठी काम केले ते सफाई कामगार, नर्स आणि डॉक्टरांना वाऱ्यावर सोडण्याचे पाप तत्कालीन मुख्यमंत्र्यांनी केले. तर एकनाथ शिंदे यांनी त्यांना सन्मान देत नोकऱ्या दिल्या, असेही जाधव म्हणाल्या.
Read Latest Maharashtra News Updates And Marathi News

‘आरोप सिद्ध होईपर्यंत आम्ही निर्दोष’

‘माणसाच्या आयुष्यात आव्हाने येत असतात. आरोप सिद्ध होईपर्यंत मला किंवा पती यशवंत जाधव यांना दोषी कसे म्हणता येईल? केंद्रीय यंत्रणांनी आमच्याबाबत जे आक्षेप नोंदविले त्याचे स्पष्टीकरण आम्ही सातत्याने दिले आहे. निवडणुकीचा अर्ज भरताना प्रतिज्ञापत्रात आम्ही सर्व माहितीही पारदर्शकतेने मांडली आहे’, असेही त्यांनी स्पष्ट केले.