आधी एक जण कमवायचा दहा खायचे; भाजप काळात दहा कमवतात, तेव्हा कुठे एक खातो, भूषण पाटलांचा टोला

मुंबई :‘मराठी-गुजराती वादाचे प्रकार भाजपने जाणून बुजून निर्माण केले आहेत. भाजप जातीपातीचे राजकारण करते. धर्माचे राजकारण करते. मात्र उत्तर मुंबईत हा प्रकार चालणार नाही. त्यांचे समाजात तेढ निर्माण करण्याचे राजकारण असून उत्तर मुंबईत याचा परिणाम होणार नाही’, असे महाविकास आघाडीचे उत्तर मुंबईचे उमेदवार मुंबई काँग्रेसचे उपाध्यक्ष भूषण पाटील यांनी बुधवारी बजावले.

‘महाराष्ट्र टाइम्स’च्या ‘मटा कट्टा’ या उपक्रमात त्यांनी आपली भूमिका मांडली. उत्तर मुंबई मतदारसंघातील प्रश्न, काँग्रेसमधील अंतर्गत गटबाजी, उत्तर मुंबईत अपेक्षित असलेली महाविकास आघाडीच्या दिग्गज नेत्यांची सभा अशा विविध मुद्द्यांवर त्यांनी उत्तरे दिली.

‘उत्तर मुंबईमध्ये पुनर्विकासाचा महत्त्वाचा प्रश्न आहे. तसेच पर्यावरण, दहिसर, पोईसर नद्यांच्या झालेल्या कचरावाहिन्या, या नद्यांमधील प्लास्टिकचा खच, रेल्वे स्थानकांचा अपेक्षित विकास न होणे, वाहतूक समस्या, फेरीवाले हेही नागरिकांसाठी महत्त्वाचे प्रश्न आहेत. लोकांच्या या समस्या दैनंदिन चर्चेतून जाणून घेत आहे’, असे पाटील यांनी सांगितले.
मराठी-गुजराती वाद जाणीवपूर्वक, धार्मिक विषमतेने सलोखा बिघडवण्याचे काम, वर्षा गायकवाडांचा दावा
मी २४ तास आणि सातही दिवस लोकांशी संपर्कात असल्याचेही ते म्हणाले. ‘भाजप हा खोटी आश्वासने देऊन सत्तेत आला. मात्र ती आश्वासने त्यांनी पूर्ण केली नाहीत. आज महागाई सन २०१४च्या तुलनेत दुप्पट ते तिप्पट झाली आहे. अलीकडेच एका कार्यक्रमात गुजराती महिलांनी संवाद साधला. काँग्रेसच्या काळात एक जण कमवायचा आणि १० जण खायचे. मात्र आता १० जण कमावतात, तेव्हा एक जण खाऊ शकतो, अशी भावना व्यक्त केल्याने गुजराती लोकांमध्येही नाराजीचे वातावरण असल्याचे लक्षात आले’, असेही ते म्हणाले.
वळसे म्हणाले व्हिलचेअरवर बसून प्रचाराला येतो, अजितदादा म्हणतात… दिलीपराव, शांत रहा, तसंही तुम्ही…
‘गोयल हे आयात केलेले उमेदवार असून त्यांना गरीबांचे प्रश्न कळत नाहीत’, अशीही टीका त्यांनी केली. याउलट मतदारसंघात फिरताना स्थानिक आणि भूमिपुत्र म्हणून फायदा होत असल्याचे ते म्हणाले. गोपाळ शेट्टींना उमेदवारी न दिल्याचा फायदा महाविकास आघाडीला होण्याचीही शक्यता त्यांनी वर्तवली. गोयल रेल्वेमंत्री असताना मजुरांना रेल्वेतून गावी जाऊ दिले नाही. या गोष्टी नागरिकांच्या लक्षात असून याचेच पडसाद मतदानातून उमटतील, असाही विश्वास त्यांनी व्यक्त केला.

Read Latest Maharashtra News Updates And Marathi News

‘शिवसैनिक आमच्यासोबत’

या आधी निवडणुकीमध्ये पाटील यांना मिळालेले अपयश, काँग्रेसला उद्धव ठाकरेंची घ्यावी लागलेली मदत, काँग्रेसमधील नेत्यांची नाराजी अशा मुद्द्यांबद्दल बोलताना शिवसैनिक सोबत असल्याचा विश्वास त्यांनी व्यक्त केला. ‘उद्धव ठाकरे यांना वर्षा बंगल्यातून अपमानास्पद पद्धतीने जावे लागले याचा राग शिवसैनिकांच्या मनात असून ते जोशाने प्रचाराचे काम करत आहेत आणि तो जोश पाहून स्वतःचाही उत्साह वाढत आहे’, असे पाटील यांनी सांगितले.