ससूनच्या ससूनच्या फॉरेन्सिक लॅबचे प्रमुख डॉक्टर अजय तावरे आणि डॉ. श्रीहरी हरळोर या दोघांना पोलिसांनी अटक केली आहे. यांनी अल्पवयीन आरोपीच्या रक्ताचे नमुने बदलल्याचं चौकशीत समोर आलं आहे. पोलिसांनी अल्पवयीन आरोपीची पुन्हा एकदा ब्लड टेस्ट करायला पाठवली होती. यावेळी पोलिसांनी फॉरेन्सिक टीमला या दोन रक्ताच्या नमुन्यांची डीएनए टेस्टही करायला सांगितली. त्यावेळी हे दोन्ही नमुने एका नाही तर वेगवेगळ्या व्यक्तीचे असल्याचं समोर आलं आणि बिंग फुटलं. त्यानंतर पोलिसांनी या दोन डॉक्टरवर कारवाई करत त्यांना अटक केली.
याप्रकरणी अपघात झाला त्या दिवसापासून न्यायाची मागणी करणारे आणि तपास योग्य दिशेने व्हावा, आरोपींना शिक्षा व्हावी यासाठी सतत पोलिसांवर दबाव आणणारे आमदार रविंद्र धंगेकर यांनी सोशल मीडियावर पोस्ट करत आपला संताप व्यक्त केला आहे. त्या रात्री अनेकांनी आपले ईमान विकले, असंही ते म्हणाले.
“पुण्यातील कल्याणीनगर कार अपघात प्रकरणात ससुन रुग्णालयाच्या 2 डॉक्टरांना अटक करण्यात आली आहे.
ब्लड रिपोर्ट मधे फेरफार केल्याचा त्यांच्यावर आरोप आहे.तुम्हाला आम्हाला काही तासात मिळणारे ब्लड रिपोर्ट या केसमध्ये जेव्हा ७ दिवस होऊनही मिळत नव्हते तेव्हाच हा प्रकार संशयास्पद वाटत होता.
याच ससून मध्ये मयत अश्विनी कोस्टा यांच्या नातेवाईकांनी मृतदेह अजून अर्धा तास शवगृहात ठेवा आमची अँब्युलन्स येत आहे,अशी विनंती केली होती. मात्र रुग्णालय प्रशासनाने अर्धा तास वाढवून द्यायला देखील नकार दिला होता.
असो, हे वाटतं तेव्हढ सोप्पं नाहीये. त्या रात्री अनेकांनी आपले ईमान विकले आहेत. जे आता हळू हळू जगासमोर येतील”, अशी पोस्ट धंगेकरांनी केली.