पंतप्रधान नरेंद्र मोदी यांच्या नेतृत्वाखालील सलग १० वर्षांच्या केंद्र सरकारच्या कालावधीत महागाई, वाढती बेरोजगारी, शेतीमालाला कमी भाव, शेतकरी आत्महत्या, शहरी आणि ग्रामीण भागात असलेला आक्रोश, प्रचंड बहुमत मिळाल्यानंतर भाजप राज्यघटना बदलणार या आणि इतर मुद्द्यांवर महाविकास आघाडीने भाजपच्या विरोधात प्रचाराच्या सुरुवातीपासूनच रान उठविले होते. त्यात महाविकास आघाडी विरुद्ध महायुती या लढाईत राज्यातील नागरिकांनी महाविकास आघाडीला साथ दिल्याचे चित्र दिसत आहे.
राज्यातील ४८ लोकसभा मतदारसंघांतील मतमोजणीला मंगळवारी सकाळी आठ वाजता सुरुवात झाल्यानंतर महाविकास आघाडीचे उमेदवार हळूहळू आघाडी घेताना दिसत होते. सकाळच्या सत्रात महायुती आणि महाविकास आघाडी समान जागांवर आघाडीवर होते. मात्र, दुपारनंतर महाविकास आघाडीच्या उमेदवारांनी आघाडी घेण्यास सुरुवात केली. काही ठिकाणी सातत्याने मतमोजणीचे कल बदलत होते. अखेर आघाडीची सरशी झाली आणि कार्यकर्त्यांमध्ये उत्साहाचे वातावरण पसरले. त्यांनी शिवसेना भवन गाठत जल्लोष केला.
-भाजप, राष्ट्रवादी काँग्रेसची दाणादाण
-शिवसेनेला मर्यादित यश
– १३ जागा जिंकत काँग्रेस ठरला सर्वांत मोठा पक्ष
– दानवे, कपिल पाटील, डॉ. भारती पवार यांचा पराभव
राज्यातील निकाल
महायुती
भाजप : ९,
शिवसेना : ७
राष्ट्रवादी : १
महाविकास आघाडी
काँग्रेस : १३
शिवसेना (उद्धव बाळासाहेब ठाकरे) : ९
राष्ट्रवादी शरदचंद्र पवार पक्ष : ७
अपक्ष : १