अल्पवयीन आरोपीच्या वडिलांना अटक करायला वेळ का लागला? पुणे पोलिसांचीही चौकशी करा: वडेट्टीवार

मुंबई : पुणे अपघातातील आरोपीची अल्कोहोल चाचणी नकारात्मक असल्याचा अहवाल पोलिसांनी दिला आहे. अल्पवयीन असलेला आरोपी दारू पित असल्याचे CCTV फुटेज असून ही अहवाल नकारात्मक आल्याने पोलिसांच्या तपासावर प्रश्न चिन्ह उपस्थित होत आहे, असे म्हणत पुणे अपघाताची न्यायिक चौकशी व्हावी, अशी मागणी विधानसभेचे विरोधी पक्षनेते विजय वडेट्टीवार यांनी केली आहे.कल्याणीनगर परिसरात शनिवारी मध्यरात्री भरधाव वेगातील एका आलिशान कारने दुचाकीला जोरदार धडक दिल्याने झालेल्या अपघातात दोघांचा मृत्यू झाला. कारच्या धडकेमुळे दुचाकीवरील सहप्रवासी तरुणी हवेत काही फूट उडून रस्त्यावर आदळली; तर दुचाकीस्वार तरुण दुचाकीसोबत काही अंतर फरफटत गेला. यामध्ये दोघांच्याही डोक्याला गंभीर दुखापत झाल्याने मोठ्या प्रमाणावर रक्तस्राव झाला होता. त्यांचा उपचारांपूर्वीच मृत्यू झाला. दुसरीकडे या अपघाताने पुण्यासह महाराष्ट्र हळहळत असताना ज्या आरोपीने दोन जणांचे जीव घेतले त्याला २४ तासांत जामीन मिळतो, यावरही विविध स्तरांतून प्रश्न विचारते जात आहेत.
पुणे अपघात : जामिनाविरोधात याचिका, बार मालकावर गुन्हे, राजकीय कनेक्शन तपासणार, पोलीस आयुक्तांची माहिती

विजय वडेट्टीवार काय म्हणाले?

पुण्यात झालेल्या भीषण अपघातात पुणे पोलिसांच्या तपासावर प्रश्नचिन्ह निर्माण होत आहे. त्यामुळे या प्रकरणी न्यायिक चौकशी व्हावी अशी मागणी विधानसभा विरोधी पक्षनेते विजय वडेट्टीवार यांनी केली आहे. वडेट्टीवार आपल्या ट्विट मध्ये म्हणतात की, पुणे अपघातातील आरोपीची अल्कोहोल चाचणी निगेटिव्ह असल्याचा अहवाल पोलिसांनी दिला आहे. अल्पवयीन असलेला आरोपी दारू पित असल्याचे सीसीटिव्ही फुटेज असूनही हा अहवाल आल्याने पोलिसांच्या तपासावर प्रश्नचिन्ह उपस्थित होत आहे.
Pune Accident: अल्पवयीन लेकाकडे पोर्शे कारच्या चाव्या देणं भोवलं, अपघात प्रकरणी बाप विशाल अगरवालला अटक

अल्पवयीन आरोपीला दारू कशी उपलब्ध झाली? रजिस्ट्रेशन नसलेली गाडी पुण्यातील रस्त्यावर कशी आली? नियम डावलून बार आणि पब सुरू होते का? होते तर त्यांच्यावर कारवाई का नाही?या प्रश्नांचा तपास न करता आरोपीला निर्दोष सिद्ध करण्यासाठी जणू पुणे पोलिसांचा तपास असल्याचे चित्र आहे, अशी टीका वडेट्टीवार यांनी केली.

आरोपी अल्पवयीन आहे हे माहिती असताना त्याच्या वडिलांना अटक करण्यात इतका वेळ का लागला? असे प्रश्न उपस्थित करत सदर घटनेची न्यायिक चौकशी व्हावी आणि या प्रकरणात पुणे पोलिसांची सुद्धा चौकशी व्हावी अशी मागणी केली आहे, असेही वडेट्टीवार यांनी म्हटले आहे.