‘आताच्या पिढीला शिक्षण सोडून फक्त क्रिकेटवर लक्ष केंद्रित करायचे असते. अशा प्रशिक्षणार्थींना मी सौरभचे उदाहरण देतो. क्रिकेटमध्ये अपयशी ठरल्यास कारकीर्द घडविण्यास शिक्षणाची जोड महत्त्वाची ठरते. सौरभने क्रिकेटसह शिक्षणालाही महत्त्व दिले. आज अमेरिकेत नोकरी करत तो आंतरराष्ट्रीय स्तरावर क्रिकेट खेळतो आहे,’ असे पय्याडे क्लबचे मालक पी. व्ही शेट्टी म्हणाले.
के. एल. राहुलचा सहकारी!
सौरभने २०१०मधील १९ वर्षांखालील वनडे वर्ल्ड कपमध्ये भारताचे प्रतिनिधित्व केले आहे. न्यूझीलंडमध्ये पार पडलेल्या या वर्ल्ड कपमध्ये टीम इंडियाचे नेतृत्व के. एल राहुलने केले होते. तर जयदेव उनाडकट, हर्षल पटेल आणि संदीप शर्मा हे सौरभचे संघसहकारी होते. त्या स्पर्धेतील सहा सामन्यांत १७.२२च्या सरासरीने ९ विकेट टिपून सौरभने चुणूक दाखवली होती. मात्र उपांत्यपूर्व फेरीत पाकिस्तानविरुद्धच्या पराभवाने भारताने आव्हान संपुष्टात आले होते. त्यावेळी संघाच्या प्रशिक्षकपदी होते ते चंद्रकांत पंडित. ‘सौरभ नेत्रावलकर म्हणजे प्रामाणिक आणि अभ्यासू क्रिकेटपटू… त्याला पाहिले की मला भारताचा माजी गोलंदाज आणि सध्याचा गोलंदाजी प्रशिक्षक पारस म्हांब्रेची आठवण यायची. सौरभच्या गोलंदाजीला वेग नव्हता; पण तो चेंडू खूप छान ‘मूव्ह’ करत असे. त्यात दिशा आणि टप्पाही अचूक. त्या वर्ल्ड कपमध्ये सौरभने छाप पाडली होती. तो मला म्हणाला होता, की सर माझा कल अभ्यासात जास्त आहे,’ अशी आठवण चंदू पंडित यांनी जागवली. ‘भारतीय संघ दूरच, पण मुंबई संघात स्थान मिळविण्यासाठीही मोठी स्पर्धा होती. त्यामुळे पदवीधर झाल्यानंतर दोन वर्ष क्रिकेटला द्यायची अन् संधी मिळाली नाही, तर उच्च शिक्षणासाठी अमेरिकेला जायचे असे ठरले होते,’ सौरभचे वडील नरेश आठवणींत रमत सांगतात.
अशी मिळाली संधी
शिक्षण घेताना सौरभ अमेरिकेतील विद्यापीठाचे प्रतिनिधित्व करत क्रिकेट लीगमध्ये भाग घेत होता. २०१६मध्ये नोकरीही लागली. त्या दरम्यान फावल्या वेळात सौरभने क्लब क्रिकेट खेळायला सुरुवात केली. एकेदिवशी अमेरिका क्रिकेट संघाच्या नेट सरावात तो गोलंदाजीसाठी गेला. सौरभने १९ वर्षांखालील वर्ल्ड कपमध्ये भारताचे प्रतिनिधित्व केले आहे, हे समजल्यावर लगेचच त्याची अमेरिका क्रिकेट संघात निवड करण्यात आली.
१४ वर्षांनंतर पुन्हा बाबर
२०१०च्या १९ वर्षांखालील वर्ल्ड कपमध्ये सौरभचा समावेश असलेल्या भारताला बाबर आझमचा समावेश असलेल्या पाकिस्तानकडून पराभव पत्करावा लागला होता. गुरुवारी सौरभने याच बाबर आझमचे नेतृत्व असलेल्या पाकिस्तानचा पराभव केला.
USAvsPAK सामन्यात खेडचा अंपायर, गुजरातचा कर्णधार अन् मुंबईचा मॅचविनर, ‘या’ भारतीयांनी गाजवलं मैदान
वर्ल्ड कपसाठी सुटीचा अर्ज
वर्ल्ड कपमध्ये खेळता यावे, यासाठी सौरभने नोकरीच्या ठिकाणी सुटीचा अर्ज केला आहे. ही सुटी १७ जूनपर्यंत असून अमेरिकेने ‘सुपर ८’मध्ये प्रवेश केल्यास त्याला सुटी वाढविण्यासाठी पुन्हा अर्ज करावा लागणार आहे. आता कामगिरीमुळे लौकिक मिळाल्याने सुटीच्या अर्जात कारण लिहावे लागणार नाही.
सौरभ नेत्रावलकरबद्दल माहिती…
अभ्यासातही हुशार. दहावी, बारावीला ९०पेक्षा जास्त टक्क्यांची कमाई
सध्या सॅन फ्रान्सिस्कोला स्थायिक. इंजिनीअर सौरभ ओरॅकल येथील आयटी फर्ममध्ये मोठ्या हुद्द्यावर कार्यरत
वेंगसरकर अकादमीच्या मोफत प्रशिक्षण शिबिरापासून क्रिकेटला सुरुवात
मुंबईतील पय्याडे क्रिकेट क्लबसाठी सातवर्षे योगदान
शिष्यवृत्ती मिळवत एअर इंडिया, बीपीसीएलचेही प्रतिनिधित्व
अंधेरीतील टेक्नॉलॉजी इन्स्टिट्यूटमधून बीई कम्प्युटर इंजिनीअरिंगचे शिक्षण
बडोद्याविरुद्ध २०१४मध्ये मुंबईकडून रणजी पदार्पण
सातत्याने संधी न मिळाल्याने भ्रमनिरास
पुढील शिक्षणासाठी अमेरिकेला रवाना