बारामती: बारामतीतील काका-पुतण्याचे बंड अवघ्या देशाने पाहिले. याच बंडाचा दुसरा अध्याय आता बारामतीत घडण्याची शक्यता वर्तवली जात आहे. एकीकडे ज्येष्ठ नेते शरद पवार यांच्याशी फारकत घेत पुतणे अजित पवार यांनी पक्ष मिळवला. त्याच अजित पवार यांचे पुतणे युगेंद्र पवार आता बारामतीत अॅक्टिव्ह झाले असून, आगामी विधानसभा निवडणूकीत आता अजित पवार व युगेंद्र पवार अशी काका-पुतण्याची लढाई बारामतीकरांना पाहायला मिळेल अशी चिन्हे निर्माण झाली आहेत.
राष्ट्रवादीतील फुटीनंतर अजित पवार, सुनेत्रा पवार व त्यांची पार्थ व जय ही दोन मुले एकीकडे तर उर्वरित पवार कुटुंब एकीकडे अशी स्थिती बारामतीत पाहायला मिळाली. नुकत्याच पार पडलेल्या निवडणुकीत येथे नणंद-भावजय असा सामना रंगला. त्यात दोन्ही पवारांकडून एकमेकांवर जोरदार आरोप-प्रत्यारोप करण्यात आले. अजित पवार यांनी शरद पवार, सुप्रिया सुळे, रोहित पवार, युगेंद्र पवार यांना लक्ष्य केले. दुसऱ्या बाजूनं आमदार रोहित पवार यांनी अजित पवार यांच्यावर थेट हल्ला चढवला. बारामतीचा विकास मीच केला, असे सांगणाऱ्या अजित पवार यांना युगेंद्र यांनी प्रत्युत्तर देत बारामतीत महत्त्वाच्या संस्था, एमआयडीसी शरद पवार यांच्यामुळे उभी राहिल्याचं सांगितलं.
युगेंद्र पवार बारामती कुस्तीगीर संघाचे अध्यक्ष आहेत. त्यांच्यावर टीका करताना अजित पवार यांनी हे कधी आयुष्यात कुस्ती खेळले नाहीत अन् संघाचे अध्यक्ष झाले अशी टीका केली होती. शिवाय मतदानानंतर ही मंडळी बारामतीत दिसणार नाहीत. मग तुम्ही आणि मीच आहे, असं सांगितलं होतं. परिस्थिती मात्र याच्या नेमकी उलट झालेली आहे. मतदानाच्या दिवसानंतर अजित पवार बारामतीकडे फिरकलेले नाहीत.
अजितदादांची दांडी, भुजबळांची नाराजी, तटकरे-शरद पवार भेटीची चर्चा; NCPमध्ये नेमकं काय घडतंय?
दुसरीकडे शरद पवार गट लगेचच विधानसभा निवडणुकीच्या तयारीला लागला आहे. युगेंद्र पवार हे पक्ष कार्यालयात दर मंगळवारी उपस्थित राहणार आहेत. नुकतंच त्यांनी कार्यालयात येत नागरिकांच्या समस्या जाणून घेतल्या. त्यांच्यासमोर पाण्याचा प्रश्न नागरिकांनी मांडला. त्यावर त्यांनी लागलीच स्वतःच्या शरयू फाऊंडेशनच्या माध्यमातून शेरेवाडी, सावंतवाडी, गोजूबावी आदी गावांमध्ये पिण्याच्या पाण्यासाठी टँकर सुरु केले.
११ मे रोजी बाबुर्डी येथे वादळी वाऱ्यानं अनेकांच्या घरावरील छत उडून गेलं होतं. तेथे भेट देत पाहणी करत फाऊंडेशनच्या माध्यमातून त्यांना आवश्यक ते साहित्य दिले. युगेंद्र यांचा कामाचा धडाका सुरु असून आगामी विधानसभेसाठी शरद पवार गटाकडून जोरदार मोर्चेबांधणी केली जात आहे. दुसरीकडे अजित पवार गट ४ जूनच्या निकालाची वाट पाहत आहे. या निकालावरच अजित पवार गटाची पुढील व्युहरचना अवलंबून असेल.