समाजवादी पक्ष राष्ट्रीय स्तरावर ‘इंडिया’मध्ये तर राज्यस्तरावर महाविकास आघाडीत सहभागी आहे. सपाच्या आघाडीतील समावेशाने मुस्लीम धर्मियांची मते मविआकडे येणार का, याविषयी अजूनही मतमतांतरे आहेत. सपाकडून भिवंडी मतदारसंघात जोरदार प्रचार सुरू असून कार्यकर्त्यांची रस्त्यावरील हजेरी लक्षणीय ठरत आहे.
एमआयएम मुंबईतील सहा जागांपैकी केवळ एकाच जागेवर निवडणूक लढवत असल्याने सपा कार्यकर्त्यांच्या सक्रीय सहभागाने मुंबईतील मतदारसंघात निर्णायक अशी मुस्लीम मते आकर्षित करण्यावर मविआचा भर आहे. याचाच एक भाग म्हणून मुंबई महापालिकेचे माजी नगरसेवक, गटनेते राहिलेले विद्यमान भिवंडी पूर्वचे आमदार रईस शेख यांनी शुक्रवारी भायखळा येथील शिवसेना (उद्धव बाळासाहेब ठाकरे) शाखा क्रमांक २१२ ला भेट दिली. यावेळी त्यांनी दक्षिण मुंबईतील उमेदवार अरविंद सावंत यांच्या लोकसभा निवडणूक प्रचारार्थ शिवसैनिकांशी संवाद साधला. भेटीदरम्यान शाखाप्रमुख विनोद शिर्के यांच्यासह शिवसैनिक उपस्थित होते.
पाकव्याप्त काश्मीरमधील जनताच भारतात विलिनीकरणाची मागणी करेल, राजनाथ सिंहांना ठाम विश्वास
‘मी कार्यकर्त्यांसह भायखळा येथील शिवसेना शाखेला भेट दिली. दोन्ही पक्षांच्या कार्यकर्त्यांनी प्रचाराशी संबंधित संवाद साधला. येथील उमेदवार अरविंद सावंत यांच्या प्रचाराच्या रणनीतीवर चर्चा केली. सावंत यांच्या प्रचारात आम्ही पूर्ण शक्तीनिशी उतरलो आहोत’, असे या भेटीसंदर्भात आमदार रईस शेख यांनी स्पष्ट केले.
Read Latest Maharashtra News Updates And Marathi News
‘बदलत्या राजकीय परिस्थितीत शिवसेना आणि मुस्लीम धर्मीय एकत्र येणे गरजेचे असून या एकीकरणामुळे शहराच्या आणि पर्यायाने राज्याच्या राजकारणात ऐतिहासिक बदल घडेल’, असा दावा त्यांनी केला. ‘सपा कार्यकर्ते आणि मुस्लिम धर्मीय यांच्या पाठिंब्याने आम्ही भारावून गेलो आहोत. यानिमित्ताने पहिल्यांदाच सपा कार्यकर्ते, नेत्यांनी शिवसेनेच्या शाखेला भेट दिली. उद्धव ठाकरे यांनी मुख्यमंत्री म्हणून करोना काळात केलेल्या कार्यामुळे अमराठी समुदायांमध्ये शिवसेनेची स्वीकारार्हता वाढल्याचे प्रचारादरम्यान दिसून येत आहे’, असे शिर्के यांनी सांगितले.