मुख्यमंत्री एकनाथ शिंदे यांनी कोणालाही थांगपत्ता लागू न देता रविवारी रात्री अचानक दिल्ली गाठली. त्यांनी गृहमंत्री अमित शहा यांची भेट घेतली. या दोन्ही नेत्यांमध्ये जवळपास एक ते दीड तास चर्चा झाल्याचे समजते. लोकसभा निवडणुकांचे निकाल, त्यानंतरचा शपथविधी या धामधुमीत मुख्यमंत्री शिंदे आणि अमित शहा यांच्यात सविस्तर चर्चा झाली नव्हती. रविवारच्या भेटीत राज्यातील आगामी विधानसभा निवडणुकीबाबत दोन्ही नेत्यांमध्ये सविस्तर चर्चा झाल्याचे समजते.
मुख्यमंत्री एकनाथ शिंदे यांच्याकडे शिवसेना हे नाव आणि धनुष्यबाण हे पक्षचिन्ह आल्याने उद्धव ठाकरे यांच्या पक्षाविरोधात जागावाटपात त्यांना १३ जागा देण्यात आल्या होत्या. उद्धव ठाकरे आणि एकनाथ शिंदे यांच्या पक्षांमध्ये झालेल्या थेट लढतींमध्ये शिवसेनेने सात जागा जिंकल्या. शिवसेनेने १५ जागा मागून घेतल्या, तरी काही ठिकाणी ऐनवेळी उमेदवार बदलण्यात आले. भाजपच्या स्थानिक पदाधिकाऱ्यांनी विरोध केल्याने यवतमाळ; तसेच हिंगोली येथे पक्षाचे उमेदवार बदलावे लागले. भाजप आणि शिवसेना यांच्या पदाधिकाऱ्यांच्या वादात नाशिकमध्ये उमेदवारी शेवटच्या क्षणापर्यंत प्रलंबित ठेवण्यात आली. याचा निवडणुकीत कसा फटका बसला, याचाही खुलासा या भेटीत करण्यात आल्याचे समजते. विरोधकांच्या प्रचाराचा फटका महाराष्ट्रात सर्वाधिक बसला, तरी शिवसेनेने त्यांच्या परीने चांगली कामगिरी केली. लोकसभा निवडणुकीत राज्यातील महाविकास आघाडीला तोंड देताना गणित कुठे चुकले, याचा खुलासा करतानाच, आता विधानसभा निवडणुकीतही शिवसेना उद्धव बाळासाहेब ठाकरे पक्ष आणि एकूणच विरोधकांच्या विरोधात कशाप्रकारची रणनीती महाराष्ट्रात झाल्यास त्याचा महायुतीला फायदा होऊ शकतो, याचे एक छोटेखानी सादरीकरणही या बैठकीत झाल्याचे समजते. जागावाटपाचा निर्णय अंतिमतः दिल्लीतील भाजपच्या शीर्षस्थ नेत्यांकडूनच होणार असल्याने तिथे पक्षाची बाजू जोरकसपणे मांडण्यासाठीच मुख्यमंत्री शिंदे यांनी अमित शहा यांची भेट घेतल्याचे खात्रीलायकरित्या समजते. दिल्लीतील भेट आटोपून सोमवारी सकाळी मुख्यमंत्री नागपूरला परतले. तिथूनच त्यांनी त्यांच्या दिवसभराच्या भंडारा दौऱ्याला सुरुवात केली.
विस्तृत सादरीकरण
लोकसभा निवडणुकीत महायुतीच्या जागावाटपात एकनाथ शिंदे यांच्या शिवसेनेच्या वाट्याला आलेल्या १३ मतदारसंघांत शिंदे यांच्या उमेदवारांना मिळालेली एकूण मते ही शिवसेना (उद्धव बाळासाहेब ठाकरे) पक्षाच्या उमेदवारांपेक्षा जवळपास दोन ते अडीच लाखांनी जास्त आहेत. शिवाय मताधिक्यही किती अधिक आहे याबाबतची आकडेवारीच शिंदे यांनी या भेटीत सादर केल्याचे समजते.