सुषमा अंधारे यांची फेसबुकवर पोस्ट काय?
मातीसाठीच जगाव मातीसाठीच मरावं
बाळा माती लय थोर तिला कसं विसराव
ही कविता आम्ही आमच्या महाविद्यालयीन आयुष्यात अनेक वेळा गुणगुणली. या कवितेचा या दोन अडीच वर्षाच्या राजकीय प्रवासात प्रत्येक दिवसाला प्रत्यय येत आहे. विशेषत्वाने तो तेव्हा येतो जेव्हा आम्ही आमच्या सेनापतीला या ओळी प्रत्यक्ष जगताना बघतो.
महाराष्ट्राच्या मातीसाठी आणि महाराष्ट्र धर्मासाठी ज्या तर्फेने नेते सन्माननीय आदित्यजी गेली अडीच वर्ष लढत आहेत त्याला तोड नाही. चळवळीच्या निमित्ताने तर महाराष्ट्र अनेक वेळा फिरून झालाय. पण राजकीय नकाशा परिचयाचा करून घ्यायचा म्हणून उभा आडवा महाराष्ट्र पिंजून काढताना ज्या ज्या ठिकाणी जाईल त्या त्या ठिकाणची महत्त्वाची मंदिर किल्ले पर्यटन स्थळ जेव्हा दिसतात. तेव्हा लोक आवर्जून भेटून सांगतात , “ताई या मंदिराच्या जीर्णोद्धारासाठी आदित्य साहेबांनी निधी दिला बर का” किंवा “या किल्ल्यासाठी आदित्य साहेबांनी हे हे काम केलं” आणि त्या प्रत्येक वेळेला हे आवर्जून वाटत राहतं की कर्तृत्वाला वयाची सीमारेषा नसतेच.
अस्खलित मराठी इंग्रजी हिंदी फ्रेंच आणि स्पॅनिश मधला त्यांचा संवाद आणि मुंबईचा कोस्टल गार्डचा प्रश्न असू देत ड्रेनेज लाईन असू देत महापालिकांच्या शाळांचा दर्जा किंवा राणीच्या बागेमध्ये येणाऱ्या पर्यटकांचा विचार प्रत्येक ठिकाणी जागतिक पातळीच्या जेवढ्या म्हणून चांगल्या गोष्टी आहेत त्या माझ्या महाराष्ट्रात आणि मुंबईत आल्या पाहिजेत यासाठीची त्यांची धडपड जाणवत राहते . त्याचा परिणाम म्हणूनच की काय एरवी सरकारी शाळांमधून आपल्या मुलांना घालण्यास कचरणारे पालक मुंबईमध्ये मात्र महापालिकांच्या शाळांसमोर गर्दी करत आहेत. हा शाळांचा दर्जा वाढीला कारणीभूत ठरतं ते आदित्यजींच द्रष्टे पण. मुंबईला राणीच्या बागेमध्ये जेव्हा पहिल्यांदा पेंग्विन आणण्याची कल्पना त्यांनी समोर आणली तेव्हा विरोधकांनी अत्यंत वाईट पद्धतीने टीका केली. पण याच पेंग्विन मुळे आता तेथे येणाऱ्या पर्यटकांची गर्दी वाढली आहे आणि त्यातून उत्पन्नाचा स्त्रोतही…
लोकांमधून निवडून येत आपलं इलेक्ट्रॉल मेरिट तर सिद्ध केलंच पण अडीच वर्षातल्या कार्यपद्धतीने आपले नेतृत्व हे सिद्ध केलं. त्या नेतृत्वाला जास्त धार आली ते पक्षफुटी नंतर महाराष्ट्रभर त्यांनी केलेल्या युवा संवाद यात्रेमुळे..
चहूबाजुंनी शत्रूच्या गराड्यात आपले वडील एकटे सापडले आहेत. या संकटाची जाणीव होताच इतर कुणीतरी आपल्यासाठी मदतीचा हात घेऊन येईल याची वाट न बघता या चक्रव्युहात स्वतःला झोकून देत निकराची झुंज दिली. सेनेचा युवराज ही इमेज मागे पडत महाराष्ट्र धर्मासाठी लढणारा शिवसेनेचा युवासेनापती ही नवी ओळख महाराष्ट्राला होत होती. त्यांची आक्रमक पण संयमी भाषण , लोकांना संवाद साधत असताना विश्वासार्हता , आश्वासकता आणि तितकीच विनम्रता ही त्यांच्याबद्दलची तरुणाई मध्ये क्रेज निर्माण होण्याची महत्त्वाची कारण.. विरोधकांच्या टीके कडे अजिबात लक्ष न देता अर्जुनाला माशाचा फक्त डोळा दिसावा त्या पद्धतीने फक्त आणि फक्त महाराष्ट्र धर्म आणि मराठी माणसाचं हित हे लक्ष ठेवत महाराष्ट्रातला एक एक उद्योग महाराष्ट्राबाहेर जात असताना इथल्या तरुणांचे मुद्दे ते तडफेने मांडत राहिले. वेदांत फॉक्सकॉन असेल किंवा मल्टी ड्रग प्रोजेक्ट असेल आर्थिक राजधानी असणाऱ्या मुंबईचा संकोच करू पाहणाऱ्या प्रत्येकाशी दोन हात करायला ते सिद्ध झाले.
काही दिवसांपूर्वी त्यांच्याशी सहज नवीन पुस्तकांवर चर्चा चालू होती . आणि मला ते सहज म्हणाले , “रघुराम राजनांच नवीन पुस्तक वाचलं का तुम्ही? बघा एकदा फार सुंदर पुस्तक आहे भारतीय अर्थव्यवस्था मागच्या दहा वर्षात कशा पद्धतीने घसरणीला लागलीये याची नेमकी मांडणी त्यांनी केलीय..! आपल्याला जर नेतृत्व करायचे तर इथला नुसता राजकीय सामाजिक आणि सांस्कृतिकच नाही तर आर्थिक भवताल सुद्धा माहीत असला पाहिजे याची जाणीव ठेवत इतकं सकस आणि चौफेर वाचन करणारा नेता तोही आजच्या पिढीतला माझ्या माहितीतलं कदाचित हे एकमात्र उदाहरण आहे.
बऱ्याचदा विरोधक जेव्हा अगदी पातळी सोडून टीका करायला लागतात तेव्हा सुद्धा ना त्यांची भाषा घसरते ना त्यांचा संयम सुटतो उलट ते सांगत राहतात… ignorance is the best humiliation !
Bajrang Sonawane : शरद पवारांना सोडलं तर पब्लिक मारेल, वडील चोपतील, बायको नाश्ता द्यायची नाही, बजरंग बाप्पांचे चिमटे
Read Latest Maharashtra News Updates And Marathi News
प्रबोधनकारांनी सांस्कृतिक चळवळ चालवली… बाळासाहेबांनी सामाजिक आणि नंतर राजकीय चळवळ उभी केली.. सन्माननीय पक्षप्रमुख उद्धव साहेब राजकीय चळवळ नेटाने पुढे नेत आहेत तर ठाकरेंच्या चौथ्या पिढीतलं हे व्हर्जन म्हणजे नव्या महाराष्ट्राचा नवा आदित्योदय होत आहे… !!
महाराष्ट्र धर्म वाचवण्याच्या त्यांच्या लढाईला यश लाभो याच वाढदिवसाच्या लक्ष लक्ष शुभेच्छा. औक्षवंत व्हा यशवंत व्हा कीर्तीवंत व्हा..
_ प्रा सुषमा अंधारे