पुण्यातील बीटी कवडे रोड येथे राहणारी महिला पायी चालत असताना दुचाकीवरुन जाणाऱ्या दोन अनोळखी इसमांनी सदर महिलेच्या गळ्यातील सोन्याचे मंगळसूत्र हिसकावून चोरुन नेले. यादरम्यान महिला रस्त्यावर पडून गंभीर जखमी झाली होती. अशाच जखमी अवस्थेत महिलेने मुंडवा पोलीस स्टेशन येथे तक्रार केली होती.
३८ वर्षीय माधवी श्रीनिवास गंपा या महिलेने दिलेल्या तक्रारीवरुन पोलिसांनी दोन अनोळखी इसमांविरुद्ध रजि. नंबर १५५/२०२४, भादंवि कलम ३९२, ३४ प्रमाणे गुन्हा दाखल केला. या इसमांनी अंदाजे २ लाख ४५ हजार किमतीचे सोन्याचे मंगळसुत्र, लक्ष्मीचे कॉईन असा ऐवज हिसकावून नेला होता.
सदर घटनेचे गांभीर्य लक्षात घेऊन वरिष्ठ पोलीस निरीक्षक, महेश बोळकोटगी यांनी घटनास्थळी भेट देऊन घटनास्थळाची बारकाईने पाहणी केली. या परिसरातील व आजूबाजूंच्या रस्त्यावरील सीसीटीव्ही फुटेज व प्राप्त माहितीच्या आधारे आरोपीचा शोध घेण्याकरिता तपास पथकाची नेमणूक करण्यात आली. तपास पथकातील अधिकाऱ्यांसह पोलीस निरीक्षक समीर करपे, पोलीस उपनिरीक्षक अनिल बिनवडे व अंमलदार यांनी सीसीटीव्ही फुटेज व तांत्रिक विश्लेषणाच्या आधारे आरोपितांची इत्यंभुत माहिती मिळवली.
दोन वर्षांपूर्वीच्या वादाचा राग मनात, संधी मिळताच तरुणाला घेरलं, धारदार शस्त्रानं निर्घृणपणे संपवलं
आरोपितांना नाशिक व जळगाव अशा वेगवेगळया ठिकाणाहून ताब्यात घेण्यात आले आहे. राहुल विजय भावसार, ३८, रा.चोपडा जि. जळगाव आणि धिरज अशोक, ३४, रा.चोपडा जि.जळगाव अशी आरोपितांची नावे आहेत. दाखल गुन्ह्यात चोरीस गेलेला मुद्देमाल आरोपितांकडून हस्तगत करण्यात आला आहे. तर सदर गुन्ह्याचा अधिक तपास सह पोलीस निरीक्षक समीर करपे हे करीत आहेत.
पोलीस आयुक्त अमितेश कुमार, पुणे शहर पोलीस सह आयुक्त प्रविण पवार, पुणे शहर अप्पर पोलीस आयुक्त मनोज पाटील, पूर्व प्रादेशिक विभाग पुणे शहर यांच्या आदेशानुसार पोलीस उपायुक्त, आर राजा, परिमंडळ-५ पुणे शहर, सह पोलीस आयुक्त आश्विनी राख, हडपसर विभाग पुणे शहर यांच्या मार्गदर्शनाखाली मुंढवा पोलीस ठाण्याचे वरिष्ठ पोलीस निरीक्षक महेश बोळकोटगी, पोलीस निरीक्षक (गुन्हे) बाबासाहेब निकम, सह पोलीस निरीक्षक, समीर करपे, पोलीस उपनिरीक्षक अनिल बिनवडे, सह पोलीस फौजदार संतोष जगताप, पोलीस अंमलदार दिनेश (नाना) भांदुर्ग, संतोष काळे, महेश पाठक, राहूल मोरे, हेमंत पेरणे, सचिन पाटील, स्वप्निल रासकर, किरण बनसोडे आदींनी सदर प्रकरणात महत्वाची कामगिरी केली आहे.