कोकण पदवीधर मतदारसंघात भाजपा विरुद्ध मनसे असे चित्र दिसत असतानाच शिवसेना शिंदे गटानेही या निवडणुकीत उडी घेतली आहे. शिवसेनेचे सचिव संजय मोरे यांनी कोकण पदवीधर मतदारसंघ निवडणूकीकरिता कोकण भवन येथून उमेदवारी अर्ज घेतला आहे. यामुळे शिवसेनेकडूनही उमेदवार निवडणुकीच्या रिंगणात असेल, असे चित्र सध्या तरी दिसत आहे.
महाराष्ट्र नवनिर्माण सेनेने यंदाच्या लोकसभा निवडणुकीत भाजपाप्रणित एनडीएला बिनशर्त पाठिंबा दिला होता. यासाठी त्यांनी पंतप्रधान नरेंद्र मोदींसह यांच्यासह काही सभा घेतल्या. लोकसभा निवडणुकीत मनसेच्या वाट्याला एकही जागा आली नाही. दक्षिण मुंबईतून शिवसेनेच्या चिन्हावर उमेदवार उभा करावा, असा प्रस्ताव दिला गेला होता, असा खुलासा खुद्द राज ठाकरे यांनी एका सभेत केला. मात्र मनसे सोडून इतर चिन्हावर उमेदवार उभा करणार नाही, अशी थेट भूमिका त्यांनी मांडली होती. लोकसभेत पाठिंबा दिल्यानंतर विधानसभेत आपले उमेदवार महायुतीद्वारे उभे करू, असेही त्यांनी जाहीर केले होते. त्यामुळे विधान परिषदेत त्यांनी अभिजीत पानसे यांची उमेदवारी जाहीर करत सर्वांनाच धक्का दिला.
विधान परिषदेच्या चार जागांसाठी एप्रिल महिन्यात कार्यक्रम जाहीर करण्यात आला होता. त्यानुसार १५ जूनला मतदान होणार होते. पण शाळांना सुट्टी असल्याने मतदानाची तारीख पुढे ढकलावी, अशी मागणी विविध राजकीय पक्ष तसेच शिक्षकांच्या संघटनांकडून करण्यात आली होती. दोन आठवड्यांपूर्वी लोकसभा निवडणुकीच्या तयारीचा आढावा घेण्यासाठी मुंबईत आलेल्या निवडणूक आयोगाच्या वरिष्ठ अधिकाऱ्यांकडे ही मागणी केली होती. त्यानुसार निवडणूक आयोगाने निवडणूक लांबणीवर टाकली होती. आता नव्याने निवडणुकीचा कार्यक्रम निवडणूक आयोगाने शुक्रवारी जाहीर केला. यानुसार २६ जूनला मतदान होईल. मतमोजणी १ जुलैला करण्यात येणार आहे. ३१ मे ते ७ जून या कालावधीत उमेदवारी अर्ज दाखल करण्याची मुदत आहे.