कोण होती आनवी कामदार?
आनवी कामदार ही व्यवसायाने सीए. मात्र आजच्या भाषेत बोलायचं तर ती सोशल मीडिया इन्फ्लुएन्सर होती. the glocal journal अशा युजरनेमसह ती इन्स्टाग्रामवर आपले ट्रॅव्हलॉग शेअर करत असे. मुंबईत राहणाऱ्या आनवीने डेलॉईटसारख्या बड्या कंपनीसोबत काम केलं होतं.
इन्स्टाग्रामवर स्वतःची ओळख सांगताना तिने ट्रॅव्हल आणि लाईफस्टाईल विषयातील डिजिटल क्रिएटर अशी केली होती. प्रवास, टिप्स, कॅफे, आलिशान जागा यांची डिटेक्टिव्ह असं स्वतःचं रसभरीत वर्णनही आनवीने स्वतःच्या इन्स्टाग्राम अकाऊण्टवर केलेलं. तिचे दोन लाख ६० हजारांहून अधिक इन्स्टा फॉलोअर्स आहेत. जवळपास २८०० पोस्ट आणि रील्समधून तिने प्रेक्षकांसाठी देश-विदेशातील पर्यटनाचं जणू एक दालनच खुलं केलं होतं.
तो व्हिडिओ शेवटचा ठरला
१६ जुलै रोजी रील शूट करताना दरीत पडून आनवीचा मृत्यू झाला. मात्र त्याच्या केवळ एक दिवस आधी म्हणजे १५ तारखेलाच तिने एक व्हिडिओ शेअर केला होता. पावसाळ्यात फिरायला जाण्यासाठी पाच पर्यटन स्थळांची माहिती तिने त्यात दिली होती. यात उदयपूर, कर्नाटक, गोवा, दिल्ली-आग्रा, भंडारदरा, शिलाँग अशी काही स्थळं तिने सुचवली होती.
चाहते हळहळले
आनवीच्या शेवटच्या व्हिडिओवर अनेक जण तिच्या निधनाविषयी हळहळ व्यक्त करत आहेत. कुणी तिच्या गोड स्वभावाचं वर्णन करत आहे, तर कुणी तिच्या प्रेझेंटेशनचं कौतुक करत आहे. कुणी तिच्यासोबत झालेल्या शेवटच्या भेटीच्या आठवणींना उजाळा देत आहेत.
नेमकं काय झालं?
आवनीचा मृत्यू अत्यंत करुणाजनक होता. सात मित्रमैत्रिणींसह ती पर्यटनाचा आनंद घेण्यासाठी रायगड येथील कुंभे धबधब्यावर गेली होती. एका सुळक्यावर रील व्हिडिओ शूट करत असताना तिचा पाय घसरला आणि ती थेट ३५० फूट खोल दरीत कोसळली. मात्र मृत्यू तिला सहज हरवू शकला नाही. खाली पडल्यानंतरही तिचा श्वास सुरु होता.
Warkari Accident : २५ वर्षांचा शिरस्ता, हौसाबाई विठ्ठलाच्या ओढीने निघालेल्या, पण पंढरीची वाट स्वर्गाकडे वळली
सुरुवातीला तिला शोधणंही कठीण होतं. मात्र काही काळात रेस्क्यू टीम तिच्यापर्यंत पोहोचल्या. तिचा श्वास चालू होता, ती आवाजाला अस्पष्ट प्रतिसादही देत होती. तब्बल ६ तासांच्या अत्यंत खडतर बचावकार्यानंतर अवनीला बाहेर काढण्यात सर्व यंत्रणांना यश आलं. अनेकांनी सुटकेचा निश्वास टाकला. सर्वांच्याच जीवात जीव आला. मात्र हा आनंद फार काळ टिकला नाही. कारण माणगांव उपजिल्हा रुग्णालयात उपचारादरम्यान तिने अखेरचा श्वास घेतला. आनवीच्या मृत्यूने सर्वत्र हळहळ व्यक्त केली जात आहे. जराशा हलगर्जीने एका उमद्या ट्रॅव्हलॉगरचा अकाली अंत झाल्याच्या भावना बोलून दाखवल्या जात आहेत.