लोकसभा निवडणुक निकालानंतर पक्षाचे नवनिर्वाचित खासदार गुरुवारी राष्ट्रवादीच्या प्रदेश कार्यालयात बैठकीसाठी आले होते. बारामतीच्या खासदार सुप्रिया सुळे आणि अहमदनगरचे निलेश लंके हे पूर्वनियोजित कार्यक्रमामुळे या बैठकीला येऊ शकले नाही. यावेळी जयंत पाटील यांनी सर्व खासदारांची ओळख करुन दिली आणि त्यांचे अभिनंदन केले.
निकालानंतर अजित पवार यांच्या पक्षातील आमदारांमध्ये कमालीची अस्वस्थता आहे, या पार्श्वभूमीवर जयंत पाटील यांनी स्पष्ट केले. निकालानंतर आमच्याकडे येण्यास काही नेते तयार असले तरी त्यांच्या प्रवेशाबाबत निर्णय विचारविनिमय केल्यानंतरच घेण्यात येईल, अशी स्पष्टोक्ती जयंत पाटील यांनी दिली. मात्र, किती आमदारांनी आतापर्यंत शरद पवार यांच्या पक्षात येण्याची इच्छा व्यक्त केली याविषयी मात्र त्यांनी मौन स्वीकारणे पसंत केले. निकालानंतर नेत्यांची मनस्थिती बदलली आहे, ते स्पष्ट दिसते आहे. सध्या माझा मोबाईलचा वापरही वाढला आहे, अशी मार्मिक प्रतिक्रिया पाटील यांनी दिली.
लोकसभेच्या निकालानंतर वारं फिरलं? दादांच्या बैठकीला ५ आमदारांची दांडी, अनेक जण पवार गटात जाण्याच्या चर्चा
विधानसभेत अनेक नवे-तरुण चेहरे महाराष्ट्रासमोर आणू
दरम्यान, निवडून आलेल्या खासदारांमध्ये बहुतेक प्रथमच निवडून आलेले खासदार असून येत्या निवडणुकीत अनेक नवे-तरुण चेहरे महाराष्ट्रासमोर आणू, ज्यांच्यावर कुठलाही डाग नाही, पक्षात काम करण्याची ऊर्जा आहे, अशा चेहऱ्यांना घेऊन पुढे शरद पवार आणि राष्ट्रवादी जनतेसमोर जाऊ, असे पाटील यांनी स्पष्ट केले. जनतेच्या मताची आम्हाला कदर आहे, अनेक नेते आमचा पक्ष सोडून गेले तरी जनतेने आम्हाला कौल दिला. आमचा पक्ष स्वच्छ झालेला आहे. त्यामुळे पक्षप्रवेशाची आम्हाला घाई नाही. योग्यवेळी योग्य ते निर्णय घेण्यात येतील, असे पाटील म्हणाले.खरगे आणि येचुरींशी चर्चा, उद्याच दिल्लीला लावून पुढची धोरणं ठरवणार, निकालानंतर शरद पवार ड्रायव्हिंग सीटवर!
पक्षाचा वर्धापनदिन अहमदनगर शहरात साजरा करणार
येत्या ९ जूनला ३ वाजता यशवंतराव चव्हाण प्रतिष्ठान मध्ये पक्षाच्या राष्ट्रीय कार्यकारणीची बैठक घेण्यात येईल याला देशभरातील पक्षाचे पदाधिकारी उपस्थित राहतील तर १० जूनला पक्षाचा वर्धापनदिन अहमदनगर शहरात साजरा करण्यात येईल, असे राष्ट्रवादीने स्पष्ट केले.
आमचा स्ट्राइक रेट ८० टक्के
राज्यात पक्षाच्या वतीने १० जागा लढवण्यात आल्या होत्या. त्यापैकी आमच्या पक्षाच्या ८ जागा निवडून आल्या आहेत. हे घवघवीत यश महाराष्ट्राच्या जनतेने आमच्या पक्षाला आणि महाविकास आघाडीला दिलेले आहे, शरद पवार ज्या बाजुने असतात, त्या बाजूचा स्ट्राईक रेट चांगला राहिला आहे. आमचा स्ट्राईक रेट ८० टक्के आहे. त्यामुळे, मी महाविकास आघाडीच्या सर्व पक्षांचे अभिनंदन करतो व जनतेचे आभार मानतो, असेही जयंत पाटील म्हणाले.