पर्यटकांना पदपथही वापरासाठी पुन्हा एकदा उपलब्ध
मुंबई सागरी किनाऱ्याअंतर्गत दुसरा बोगदा १० जूनला खुला करण्यात आला. या परिसरात येणाऱ्या पर्यटकांसाठी दर्जेदार सुविधा पुरवण्याचे निर्देश मुंबई महापालिका आयुक्त भूषण गगराणी यांनी दिले आहेत. प्रसाधनगृह आणि पदपथ स्वच्छतेसाठी नियमितपणे देखरेख ठेवण्याच्या सूचनाही त्यांनी दिल्या आहेत. मरिन ड्राइव्ह परिसरातील रस्त्याचे रुंदीकरण या प्रकल्पाच्या निमित्ताने करण्यात आले आहे. त्यामुळे १०.५६ मीटर रुंदीचा आणि एक किमी लांबीचा रस्ता प्रिन्सेस स्ट्रीट उड्डाणपूल ते मफतलाल क्लब सिग्नल या दरम्यान वापरासाठी उपलब्ध झाला आहे. प्रिन्सेस स्ट्रीट उड्डाणपूल ते उत्तर वाहिनीच्या दिशेला रॅम्पला जोडणारा ४०० मीटरचा रस्ता तयार करण्यात आला आहे. यापूर्वी अस्तित्वात असलेल्या पदपथाचा वापर करून त्यावर हा रस्ता तयार करण्यात आला आहे. त्यापुढे मफतलाल सिग्नलपर्यंत एक किमी लांबीचा नवा रस्ता वापरासाठी उपलब्ध झाला आहे. प्रिन्सेस स्ट्रीट उड्डाणपुलाशेजारच्या या अतिरिक्त सेवा रस्त्याचा उत्तर बोगद्याच्या प्रवेशासाठी वापर करता येईल. अतिरिक्त सेवा रस्त्यासोबतच पर्यटकांना पदपथही वापरासाठी पुन्हा एकदा उपलब्ध झाला आहे.
या पदपथाशेजारी समुद्राच्या भिंतीची उभारणी ही बीम आणि कॉलमचा वापर करून करण्यात आली आहे. त्यामुळे अतिरिक्त भराव न घालताच, आतल्या बाजूला हा नवीन पदपथ तयार करण्यात आला आहे. या पदपथाला धडकणाऱ्या समुद्राच्या लाटांचा आघात रोखण्यासाठी टेट्रापॉडचा वापर करण्यात आला आहे.
– किनारा मार्गाचे काम पूर्ण झाल्याने पदपथ पुन्हा खुला
– १.०७ किमी लांबीचा पदपथ पूर्ववत
– पावसाळ्यात पर्यटकांसाठी सुविधा
– सोमाणी चौक ते सावित्रीबाई वसतिगृहापर्यंतचा भाग खुला
आसन व्यवस्था, प्रकाश व्यवस्था
पर्यटकांना बसण्यासाठी पूर्वीप्रमाणेच उत्तम व्यवस्था करण्यात आली आहे. चालण्यासाठी अधिक दर्जेदार पदपथ उपलब्ध करून देण्यात आले आहेत. पदपथांना लागूनच पथदिवे उभारणी नियोजनाचे काम प्रगतिपथावर आहे.
टेट्रापॉडचा वापर
मरिन ड्राइव्हच्या सीफेस परिसरात धडकणाऱ्या लाटांचा वेग आणि आघात रोखण्यासाठी टेट्रापॉडचा वापर संपूर्ण किनारपट्टीवर करण्यात आला आहे. मरिन ड्राइव्ह किनारपट्टीवर ५९० मीटर भागात टेट्रापॉडचे काम दक्षिण ते उत्तर अशा दिशेने प्रगतिपथावर आहे. एकूण १३ हजार टेट्रापॉड बसवण्यात येणार आहेत.