अशातच काल वरळी विधानसभा मतदारसंघात एका क्रिकेट स्पर्धेचे आयोजन करण्यात आलं होतं. मुंबई येथील ना. म. जोशी मार्गावरच्या महाराष्ट्र हायस्कूल मैदानावर स्थानिक क्रिकेट स्पर्धेचं आयोजन करण्यात आलं होतं. यावेळेस मनसेच्या संदीप देशपांडे यांनी सकाळी ११ वाजता टॉस करून क्रिकेट स्पर्धेचं उद्घाटन केलं. देशपांडे यांनी यावेळेस छोटेखानी भाषण केलं. मात्र मैदानावर फटकेबाजी केली ती आदित्य ठाकरे यांनी. सायंकाळच्या सुमारास आमदार सुनील शिंदेसह आदित्य ठाकरे मैदानात दाखल झाले. त्यांनी सहा ते सात चेंडू खेळून काढले. यातील एका चेंडूवर त्यांनी षटकार मारला.
आगामी विधानसभा निवडणुकीच्या दृष्टिकोनातून मनसेनं वरळी विधानसभेवर लक्ष केंद्रित केलेलं आहे. मनसेकडून संदीप देशपांडे वरळीत तयारी करत आहेत. विधानसभेत आदित्य ठाकरेंना त्यांच्याच मतदारसंघात जेरीस आणण्याचा मनसेचा प्लान आहे. मात्र स्थानिक क्रिकेट स्पर्धेच्या आयोजनात मनसेने उद्घाटन केलेल्या पीचवर आदित्य ठाकरे यांच्या षटकाराचीच फार चर्चा रंगली होती.