इगो मीडियातर्फे लावण्यात आलेले ८ अनधिकृत आणि धोकादायक होर्डिंग्ज अद्यापही रेल्वे पोलिसांच्या हद्दीत आहेत. ते हटवण्यासाठी ३ दिवसांची मुदत देण्यात आली आहे. तीन दिवसांच्या कालावधीत होर्डिंग्ज न हटवल्यास आपत्ती व्यवस्थापन प्राधिकरण या नात्यानं महापालिका स्वत: होर्डिंग्ज हटवेल, अशी नोटीस पालिकेच्या अतिरिक्त आयुक्त डॉ. अश्विनी जोशी यांनी रेल्वे प्रशासनाला बजावली आहे.
रेल्वे किंवा इतर कोणत्याही शासकीय प्राधिकरणानं त्यांच्या अखत्यारित जागेत कोणती कार्यवाही करावी हा त्यांचा अधिकार असला तरी, ज्या विषयांचा नागरी सेवा सुविधांशी संबंध येतो तिथे महापालिकेचा अधिकार नजरेआड करता येणार नाही, अयं मुंबई महापालिकेचे आयुक्त भूषण गगराणी यांच्याकडून स्पष्ट करण्यात आलं आहे.
मुंबईत होर्डिंग लावण्यासाठी पालिकेचे नियम पाळावे लावतात. होर्डिंगचा आकार कमाल ४० बाय ४० फूट इतका असावा लागतो. घाटकोपरमध्ये कोसळलेलं होर्डिंग १२० बाय १२० फुटाचं होतं. पण भिंडेच्या इगो मीडियानं सगळेच नियम पायदळी तुडवले. घाटकोपरमधील दुर्घटनेनंतर पालिकेला खडबडून जाग आली आहे. दादर पूर्व परिसरातील रेल्वे हद्दीतील इगो मीडियाच्या ८ मोठ्या होर्डिंग्जना नोटीस बजावण्यात आली आहे. होर्डिंग्ज न हटवल्यास पालिका स्वत: ती हटवेल आणि खर्चाची वसुली केली जाईल, असा उल्लेख नोटिशीत आहे.