प्रसारमाध्यांना दिलेल्या मुलाखतीत आदित्य ठाकरे यांनी भाजपवर टीका केली. ‘ईशान्य मुंबईत एका सोसायटीत मराठी प्रचार करणाऱ्या कार्यकर्त्यांना प्रवेश देण्यात आला नाही, ही मस्ती भाजपामुळे वाढली आहे. याआधी असे वातावरण कधीही मुंबईत नव्हते. मुंबईविरोधी, महाराष्ट्रविरोधी कारवाई करणाऱ्या भाजपबरोबर आम्ही राहू शकत नाही’, असेही आदित्य ठाकरे म्हणाले. ‘तुम्ही ज्या राज्यात आहात त्या राज्याचा विचार करणार नाही का? भाजप संविधान बदलू इच्छितोय. भाजपला लोकशाही संपवायची आहे. भाजपला मित्रपक्ष नकोत, भाजपाला मुंबई तोडायची आहे’, असा आरोप यावेळी त्यांनी केला. ‘भाजपने मुंबई विरोधी उमेदवार दिले आहेत. मिहीर कोटेचा, पियुष गोयल असे उमेदवार मुंबईत देण्यात आले आहेत. पियुष गोयल यांनी केंद्रात असताना गेल्या दहा वर्षांत मुंबईसाठी काही आवाज उठवला का’, असा प्रश्न आदित्य यांनी केला.
मनसेच्या बिनशर्त पाठिंब्यावर टीका. .
‘मनसेने भाजपला बिनशर्त पाठिंबा दिला आहे. गुजरात आणि गुजराती समाजाशी आमचे काही भांडण नाही. पण मुंबईतून जेव्हा गुजरातला उद्योग पळवून नेले जातात, तिथे आम्ही विरोध करणारच. मुंबईत मराठी माणसाला नोकरी नाकारली जाते. गुजराती सोसायटीत मराठी माणसाला प्रवेश दिला जात नाही किंवा मुंबईतील उद्योगधंदे गुजरातला जात आहेत, त्यालाही मनसेचा बिनशर्त पाठिंबा आहे का’, असा प्रश्न आदित्य ठाकरे यांनी विचारला.
फडणवीस यांचे प्रत्युत्तर
आदित्य ठाकरे यांनी केलेल्या आरोपांना उपमुख्यमंत्री देवेंद्र फडणवीस यांनी प्रत्युत्तर दिले आहे. ‘उद्धव ठाकरे हे मराठी माणसाचे ठेकेदार नाहीत, ते म्हणजे मराठी नाहीत. ते म्हणजे महाराष्ट्र नाहीत. मराठी माणसाला मुंबईतून निर्वासित करण्याचे काम ठाकरे यांनीच केले आहे. त्यामुळे त्याबाबत ठाकरेंनी बोलू नये’, अशा शब्दांत फडणवीस यांनी आदित्य ठाकरे यांना प्रत्युत्तर दिले.