पुणे : बिल्डर बापाच्या पैशावर मजा मारून, दोन निष्पापांचा जीव घेऊन व्यवस्थेच्या परवानगीने एका दिवसांत जामीन घेतल्यानंतर पुणे पोर्शे कार अपघातातील अल्पवयीन आरोपी वेदांत अगरवालच्या नावाने एक रँप साँग व्हायरल होत आहे. एक दिन में मुझे मिल गई बेल, फिरसे दिखाऊंगा सडक पे खेल, अशा प्रकारची भाषा संबंधित मुलगा व्हिडीओच्या माध्यमातून करत आहे. दोन निष्पापांचा जीव घेऊनही त्याच्या चेहऱ्यावर अस्वस्थतेचा लवलेशही दिसत नाही, उलट त्याच्या ठायी ठायी पक्का माजोरडेपणा ठासून भरलेला दिसतोय. समाजमाध्यमांतून प्रसारित होत असलेला रॅपसाँगच्या व्हिडीओची पुष्टी सध्या तरी ‘महाराष्ट्र टाइम्स’ करत नाही. तो व्हिडीओ डीपफेक किंवा कृत्रिम बुद्धिमत्तेने बनविला असण्याचीही शक्यता नाकारता येत नाही.कल्याणीनगर अपघात प्रकरणात येरवडा पोलिसांनी ताब्यात घेतलेल्या कारचालक अल्पवयीन युवकाला बाल न्याय मंडळाने लगोलग रविवारी जामीन मंजूर केला होता. त्याला जामीन मिळाल्यानंतर त्याचे पडसाद समाजमाध्यमांसहित संपूर्ण महाराष्ट्रात उमटले. या युवकाने येरवडा वाहतूक पोलिसांसोबत पंधरा दिवस वाहतूक नियमनाचे काम करावे, त्याने अपघातावर तीनशे शब्दांचा निबंध लिहावा, वाहतूक जागृती फलक रंगवावेत आणि मानसोपचार तज्ज्ञांचे समुपदेशन करावे, अशा अटी-शर्ती न्यायालयाने घातल्या होत्या. न्यायालयाच्या या अटी शर्तींवर सगळीकडूनच तीव्र रोष व्यक्त होऊ लागल्यानंतर बुधवारी रात्री पुन्हा बाल न्याय मंडळासमोर सुनावणी झाली. सुनावणीत अल्पवयीन मुलाला पाच जूनपर्यंत बाल निरीक्षण गृहात ठेवण्याचे आदेश बाल न्याय मंडळाने बुधवारी दिले.
ओला, उबर, ट्रक ड्रायव्हर यांना निबंध लिहायला सांगाल का? पुणे अपघातावर राहुल गांधी यांची सडेतोड भूमिका
रॅपमधून शिवीगाळ…..
करके बैठा मै नशे…इन माय पोर्शे
सामने आया मेरे कपल, अब वो है निचे
साऊंड सो क्लिशे.. सॉरी गाडी चढ गई आप पे
१७ की उमर पैसे खूब है मेरे बाप के पास
एक दिन में मुझे मिल गई बेल, फिरसे दिखाऊंगा सडक पे खेल
प्लेइंग केरोसिन फोन्क इन माय नेक्स्ट स्पोर्ट्स कार
चार यार मेरे साथ फाड देंगे ***
शनिवारी घटना, रविवारी लगोलग जामीन, घरी गेल्याबरोबर रॅप साँग?
शनिवारी घटना घडल्यानंतर रविवारी तत्काळ वेदांतला बाल न्याय मंडळाने जामिन दिला. कारचालक युवकाने अॅड. प्रशांत पाटील यांच्यामार्फत जामिनासाठी अर्ज केला. या युवकाविरोधात लावलेली कलमे ही जामीनपात्र आहेत. ही घटना दुर्दैवी असून, त्याचा तपास सुरू आहे. युवकाकडून पोलिसांना तपासात पूर्णपणे सहकार्य केले जाईल; तसेच न्यायालयीन सुनावणीच्या तारखांना तो उपस्थित राहील, असा युक्तिवाद अॅड. पाटील यांनी केला. त्यावर या युवकाने पंधरा दिवस येरवडा वाहतूक विभागातील कॉन्स्टेबलसोबत वाहतुकीचे नियमन करावे, त्याने अपघातावर तीनशे शब्दांचा निबंध लिहावा, अशा शर्ती न्यायालयाने घातल्या.
