नव्या सीसीटीव्ही फुटेजमध्ये आरोपी मुलगा कारमधून बाहेर पडताना दिसत आहे. हे फुटेज अपघाताच्या एक दिवस आधीचं आहे. अपघातावेळी अल्पवयीन मुलगा कार चालवत नव्हता, चालक कार चालवत होता, असे दावे आरोपीच्या कुटुंबाकडून सुरुवातीला करण्यात आले. त्या पार्श्वभूमीवर नवं सीसीटीव्ही फुटेज महत्त्वाचं आहे. कारण या व्हिडीओमध्ये आरोपी मुलगा पोर्शे कारच्या ड्रायव्हर साईडमधून बाहेर पडताना दिसत आहे. त्यामुळे अपघाताच्या आदल्या दिवशी आरोपी तरुणच कार चालवत होता हे सिद्ध होतं.
कॉलेजमध्ये आयोजित करण्यात आलेल्या एका समारंभाला आरोपी त्याच्या मित्रासह गेला होता. दोघेही पोर्शे कारनंच कॉलेजला गेले होते. कॉलेजच्या आवारात असलेल्या सीसीटीव्हीमध्ये दोघे कैद झाले. त्यात ते पोर्शे कारमधून उतरताना दिसत आहेत. दोघे कारमधून उतरुन चालत त्यांच्या मित्रांकडे जातात. मग मित्रांचा गोतावळा कॉलेजात शिरतो.
Pune Car Accident: ‘ती’ कार गिफ्ट दिलेली, आजोबांनी फोटो WhatsApp ग्रुपवर टाकलेला; मित्रानं गुपितं फोडली
कल्याणीनगरमध्ये झालेल्या अपघातात दोन तरुण अभियंत्यांचा मृत्यू झाला. त्यावेळी आरोपी मुलगा कार चालवत नव्हता, असं भासवण्याचा प्रयत्न करण्यात आला. कार चालवत असताना आरोपीच्या शेजारी बसलेल्या चालकानं अपघाताचा आळ स्वत:वर घ्यावा यासाठी बराच दबाव टाकण्यात आला, अशी माहिती पोलीस आयुक्त अमितेश कुमार यांना दिली आहे. त्यावेळी अल्पवयीन आरोपीच कार चालवत होता, याचे सबळे पुरावे आमच्याकडे असल्याचं आयुक्तांनी सांगितलं.
‘अल्पवयीन मुलगा पबमध्ये मद्यपान करत होता, त्या पबमधील सीसीटीव्ही फुटेज आमच्याकडे आहे. पबमध्ये निघताना तो शुद्धीत होता. आपल्या हातून अपघात घडू शकतो याची जाणीव त्याला होती. त्यामुळेच या प्रकरणात कलम ३०४ लावण्यात आलं आहे,’ असं अमितेश कुमार म्हणाले. त्यावेळी चालक कार चालवत असल्याचं भासवण्यात आला. तसा बनाव करण्यात आला. पण त्यावेळी मुलगाच कार चालवत असल्याचे पुरावे आमच्याकडे आहेत, असं कुमार यांनी सांगितलं.