मुंबई येथील घटनेच्या पार्श्वभूमीवर शहरातील ३४९ होर्डिंगचे ‘स्ट्रक्चरल ऑडिट’ (संरचनात्मक लेखापरीक्षण) करण्यात आले नसून, ८५ होर्डिंग बेकायदा उभारण्यात आल्याची धक्कादायक माहिती समोर आली आहे. त्यामुळे मुंबईतील होर्डिंग कोसळण्याच्या दुर्घटनेची पुनरावृत्ती होऊ नये, यासाठी ‘स्ट्रक्चरल ऑडिट’विना उभ्या असलेल्या होर्डिंग कंपन्यांना नोटिसा बजावण्यास सुरुवात झाली आहे.
मुंबईतील घाटकोपर येथे वादळी वाऱ्यामुळे होर्डिंग कोसळून १४ जणांचा मृत्यू झाल्याची दुर्घटना घडली आहे. गेल्या महिन्यात वाघोली परिसरातील रस्त्यावरही होर्डिंग कोसळले होते. सुदैवाने त्या वेळी कोणतीही जीवितहानी झाली नाही; परंतु ऑक्टोबर २०१८मध्ये पुण्यातील जुना बाजार येथील शाहीर अमर शेख चौकात, तर पिंपरी-चिंचवडमधील किवळे येथे एप्रिल २०२३मध्ये होर्डिंग कोसळून जीवितहानी झाली होती.
या घटनांच्या पार्श्वभूमीवर होर्डिंग उभारण्याबाबत नियमावली तयार करण्यात आली. त्यात जमिनीपासून होर्डिंगची उंची निश्चित करण्यात आली; तसेच नियमित कालावधीने या होर्डिंगच्या सांगाड्याचे ‘स्ट्रक्चरल ऑडिट’ करण्याचे बंधन घालण्यात आले होते. मात्र, होर्डिंग कंपन्यांकडून या नियमावलीला हरताळ फासण्यात आला आहे. वाऱ्यामुळे उंच होर्डिंग कोसळून अपघात घडतात. या पार्श्वभूमीवर ही खबरदारी घेण्यात आली आहे.