मध्य रेल्वेकडून सीएसएमटीवरील फलाट विस्तारीकरणाचे काम काही दिवसांपासून सुरू आहे. या कामाचा शेवटचा टप्पा सुरू असल्यामुळे मध्य रेल्वेने सीएसएमटी स्थानकावर येणाऱ्या काही गाड्या शुक्रवारपासून (१७ मे) ते २७ मे दरम्यान येणार नाही. त्यामुळे या गाड्या दादर स्थानकापर्यंत धावतील; तसेच परतीचा प्रवास दादर येथूनच करावा लागणार असल्याने प्रवाशांची गैरसोय होणार आहे. यामध्ये पुणे-मुंबई धावणाऱ्या इंटरसिटी एक्स्प्रेसचा समावेश आहे. यामध्ये २८ मे ते दोन जून दरम्यान सर्वाधिक गाड्यांना फटका बसणार असून, त्यामध्ये डेक्कन क्वीन, डेक्कन एक्स्प्रेस, प्रगती या गाड्यांचा समावेश आहे.
‘डेक्कन क्वीन’चा वाढदिवस हुकणार
डेक्कन क्वीनचा वाढदिवस दर वर्षी एक जूनला साजरा केला जातो; पण यंदा १ आणि २ जूनला ‘डेक्कन क्वीन’ रद्द केली जाणार आहे. यंदा ‘डेक्कन क्वीन’चा ९७वा वाढदिवस होणार होता; परंतु गाडी रद्द केल्याने यंदाचा वाढदिवस हुकणार आहे.
पुणे रेल्वे विभाग उदासीन
मुंबईतील प्लॅटफॉर्मच्या कामामुळे मोठ्या प्रमाणात गाड्या प्रभावित होणार आहेत. पुण्याहून मुंबईला प्रवास करणाऱ्यांची संख्या मोठी आहे. पुणे ते मुंबई दरम्यानच्या काही गाड्या देखील रद्द असणार आहेत. पण, पुणे विभाग आम्हाला याची माहितीच नसल्याचे सांगत आहे. अगोदरच रद्द गाड्यांची माहिती दिल्यास प्रवाशांना काही तरी नियोजन करता येईल. पण, पुणे विभागाच्या उदासीनतेचा फटका प्रवाशांना सहन करावा लागणार आहे. पुणे जनसंपर्क विभागाकडून गाड्या रद्द असल्याची माहिती नसल्याचे सांगितले.
रद्द केलेल्या गाड्या…
– पुणे-मुंबई-पुणे प्रगती एक्स्प्रेस (२८ मे ते २ जून)
– पुणे-मुंबई इंटरसिटी एक्स्प्रेस (३१ ते २ जून)
– पुणे-मुंबई-पुणे डेक्कन एक्स्प्रेस (१ व २ जून)
– पुणे-मुंबई-पुणे डेक्कन क्वीन एक्स्प्रेस (१ व २ जून)
– कुर्ला-मडगाव-कुर्ला (१ व २ जून)
दादरपर्यंत धावणाऱ्या गाड्या…
– मुंबई-चेन्नई एक्स्प्रेस
– हैदराबाद-मुंबई हुसेनसागर एक्स्प्रेस
– भुवनेश्वर-मुंबई कोणार्क एक्स्प्रेस
– साईनगर शिर्डी-मुंबई-साईनगर शिर्डी वंदे भारत एक्स्प्रेस
– होस्पेट-मुंबई-होस्पेट एक्स्प्रेस
कामामुळे रेल्वेने आचानक गाड्या रद्द केल्या आहेत. चार महिने अगोदर बुकिंग करून प्रवाशांना काय फायदा झाला. रेल्वेच्या या ढिसाळ कारभारामुळे प्रवाशांना फटका बसत आहे.- हर्षा शहा, अध्यक्ष, रेल्वे प्रवासी ग्रुप