अजित पवार बोलत नाही, तुमचेही आरोपीच्या वकिलाशी संबंध असल्याच्या चर्चा, शरद पवार चिडून म्हणाले…
पुणे अपघातातील आरोपींना कठोरात कठोर शासन करण्याची मागणी होत असताना राज्याचे उपमुख्यमंत्री तथा पुण्याचे पालकमंत्री अजित पवार शांत का आहेत? ते काहीच का बोलत नाहीत? असे प्रश्न पत्रकारांनी पवार यांना विचारले. त्यावर ते का बोलत नाहीत, हा प्रश्न तुम्ही त्यांनाच विचारा, असे म्हणत यावर अधिक बोलणे पवार यांनी टाळले. तसेच आरोपींच्या वकिलांशी आपलेही संबंध असल्याच्या चर्चा आहेत, असे पत्रकारांनी विचारल्यावर पवार जरासे चिडून म्हणाले- “एखाद्या वकिलाला मी भेटलो असेल तर त्याचा संबंध याच्याशी लावता तुम्ही… प्रत्येक गोष्टीवर मीच भाष्य करावे, असे गरजेचे नाही. या प्रकरणात गृहमंत्र्यांनी जबाबदारी पार पाडली हे दिसल्यानंतर उगीच याला वेगळे स्वरूप देण्याची आवश्यकता नाही”.
अजित पवार पुण्याचे पालकमंत्री आहेत की बिल्डरांचे? : संजय राऊत
अजित पवार यांच्या मौनावर ठाकरे गटाचे खासदार संजय राऊत यांनीही टीका केली. अजित पवार हे पुण्याचे पालकमंत्री आहेत. त्यांनी भाजप नेते चंद्रकांत पाटील यांच्याकडून ती जबाबदारी काढून घेऊन स्वत: पुणे जिल्ह्याची सूत्रे हाती घेतली आहेत. पुणे शहर चुकीच्या कारणांसाठी चर्चेत असताना अजित पवार गप्प का आहेत? ते पुण्याचे पालकमंत्री आहेत की बिल्डरांचे? असा जळजळीत सवाल संजय राऊत यांनी विचारला.