हडपसर पोलिसांनी घटनास्थळी धाव घेऊन टँकरमधील पाणी काढून मृतदेह खाली उतरवला. हडपसर पोलिस ठाण्यात मृत्यूची नोंद करण्यात आली आहे. कौसल्या मुकेश मोरया (वय ३५ रा. दुगड चाळ, हांडेवाडी रस्ता) असे मृत महिलेचे नाव आहे. हडपसर पोलिस ठाण्याचे वरिष्ठ निरीक्षक संतोष पांढरे यांनी दिलेल्या माहितीनुसार, पुरुषोत्तम नरेंद्र ससाणे (वय २७, रा. दुगड चाळ, हांडेवाडी) असे या टँकरचालकाचे नाव आहे. बुधवारी दिवसभर हडपसरमध्ये पाणीपुरवठा केल्यानंतर, रात्री दुगड चाळ येथे साडेनऊच्या सुमारास घराजवळ टँकर उभा करून तो घरी गेला.
गुरुवारी सकाळी नेहमीप्रमाणे त्यांनी टँकर (एमएच १२ डब्ल्यूजे १०९१) बाहेर काढला. त्यानंतर त्यांनी रामटेकडीत पाणी भरले. टँकर घेऊन ते फुरसुंगीतील सचिन कामटे यांच्या घरी पाणी पोहोचविण्यासाठी गेले. मात्र, टँकरच्या वॉलमधून पाणी बाहेर येईना. त्यामुळे त्यांनी सुरुवातीला वॉल आणि पाइप काढून पाहिले असता, साडीचा पदर नजरेस पडला.
साडी कुठून आली, हे पाहण्यासाठी ससाणे टँकरवर चढले, टँकरचे झाकण उघडले असता आत महिलेचा मृतदेह तरंगत असल्याचे दिसले. त्यांनी तत्काळ पोलिसांना कळवले. पोलिसांनी मृतदेह शवविच्छेदनासाठी ससून रुग्णालयात पाठवला. महिला बेपत्ता असल्याची तक्रार कोंढवा पोलिसांत नोंदवण्यात आली.