आरोपी अल्पवयीन असूनही त्याच्या वडिलांनी त्याच्या हाती महागडी कार दिली. त्या कारच्या धडकेत दोघांचे हकनाक जीव गेले. विशाल अग्रवाल असं आरोपीच्या वडिलांचं नाव असून त्यांना काल अटक करण्यात आली. राहुरी-नगर-पाथर्डी विधानसभा मतदारसंघाचे राष्ट्रवादी काँग्रेसचे आमदार प्राजक्त तनपुरे यांच्या पत्नी सोनाली तनपुरे यांनी या अपघातानंतर एक्सवर एक पोस्ट लिहिली आहे. बिल्डर विशाल अग्रवाल यांच्या आरोपी मुलाबद्दलची ही पोस्ट लक्षवेधी ठरतेय.
सोनाली तनपुरेंच्या पोस्टमध्ये नेमकं काय?
कल्याणीनगर येथील कार ॲक्सीडेंट नंतर पुन्हा एकदा त्या गोष्टी आठवल्या. संबंधित घटनेतील मुलगा हा माझ्या मुलासोबत एकाच वर्गात शिकत होता. त्यावेळी त्यापैकी काही मुलांकडून माझ्या मुलाला खूप त्रास झाला होता. या मुलांची तक्रार मी त्यांच्या पालकांकडे केली होती. मात्र योग्य तो प्रतिसाद मिळाला नाही. शेवटी या मुलांच्या त्रासाला कंटाळून त्याची शाळा बदलावी लागली. त्या घटनांचा वाईट परिणाम आजही त्याच्या मनावर आहे, अशा शब्दांमध्ये सोनाली तनपुरेंनी त्यांना आलेला कटू अनुभव सांगितला आहे.
‘वाईट प्रवृत्ती असणाऱ्या मुलांची दखल वेळीच घेतली गेली असती तर असा भयंकर गुन्हा कदाचित घडला नसता. त्यादिवशी झालेल्या अपघातात सुशिक्षित तरुण तरुणीचा निष्पाप बळी गेला. त्यांची कुटुंबे उद्ध्वस्त झाली. या कुटुंबांना न्याय मिळायला हवा,’ असं सोनाली तनपुरेंनी त्यांच्या पोस्टमध्ये म्हटलं आहे.