भायखळा येथे सेवा बजावण्यासाठी विशाल यांनी २७ एप्रिलला रात्री साडेआठच्या सुमारास लोकल पकडली. या प्रवासात माटुंगा ते शीव स्थानकांदरम्यान अज्ञातांनी हातावर फटका मारून त्यांचा मोबाइल फोन चोरला. या चोरांचा पाठलाग केल्यानंतर ४ ते ५ जणांनी घेरून विषारी इंजेक्शन दिले, असे विशाल यांनी म्हटले होते. या प्रकरणी २९ एप्रिलला कोपरी पोलिस ठाण्यात गुन्हा दाखल करण्यात आला. मात्र ही घटना रेल्वे पोलिस हद्दीत घडल्याने हे प्रकरण १ मे रोजी रात्री दादर रेल्वे पोलिसांकडे वर्ग करण्यात आले. तत्पूर्वी विशाल यांचा मृत्यू झाल्याने या घटनेचे गांभीर्य वाढले होते.
रेल्वे पोलिसांनी स्थानकातील सीसीटीव्ही तपासले असता माटुंगा, शीव रेल्वे फलाटांवर अशी कोणतीही घटना घडला नसल्याचे स्पष्ट झाले. विशाल यांनी कोपरी पोलिसांकडे दिलेल्या जबाबात आणि प्रवास वेळेतही तफावत होती. यामुळे विशाल यांच्या मृत्यूचे नेमके कारण जाणून घेण्यासाठी शवविच्छेदन करण्याचा निर्णय घेण्यात आला. या शवविच्छेदनाचा अहवाल नुकताच दादर रेल्वे पोलिसांना प्राप्त झाला. अहवालात विशाल यांच्या शरीरात इंजेक्शन दिल्याचे आणि विषामुळे त्यांचा मृत्यू झाल्याची बाब आढळून आली नाही, अशी माहिती रासायनिक विश्लेषण अहवालाच्या आधारे रेल्वे पोलिसांनी दिली.
विशाल पवार यांना नुकतीच कावीळ झाली होती. त्यात ते दारूचे सेवन करत होते. अल्कोहोलच्या अतिसेवनामुळे त्यांचे अनेक अवयव निकामी झाले असावेत आणि अखेरीस हृदयविकाराचा धक्का बसून त्यांचा मृत्यू झाला असावा, अशी शक्यता रेल्वे पोलिसांनी व्यक्त केली.