विजय वडेट्टीवार यांचे ट्विट काय?
लोकसभा निवडणुकीने दाखवून दिले, महाराष्ट्रातील जनता आमच्या बरोबर आहे.पण जनतेने निवडून दिलेल्या काही आमदारांनी पक्षाशी बेइमानी केली आहे. पक्षातील बेईमान आम्हाला शोधून काढायचे होते म्हणूनच काँग्रेसने विधानपरिषद निवडणूक लढवली होती. आता पक्षातील कचरा साफ होईल.
कालच्या निकालानंतर घरचे भेदी शोधण्यात आम्हाला यश आले आहे. याबाबत पक्षश्रेष्ठींना संपूर्ण अहवाल देण्यात आला आहे, जे दोषी आहेत त्यांच्यावर कारवाई होईल. आमदार कैलास गोरंट्याल यांनी क्रॉस वोटिंग केल्याच्या बातम्या येत आहे. पण हे वृत्त पूर्ण चुकीचे आहे.आमदार कैलास गोरंट्याल हे पक्षनिष्ठ आहेत, त्यांच्याबाबतचे वृत्त खोडसाळपणाचे आहे.
MLC Election Results 2024: काँग्रेसचा पुन्हा गेम, मते फुटल्याची चर्चा, महायुतीचा विजयी झेंडा, मविआला धक्का!
काँग्रेसची मते फुटतील, याची आधीपासूनच चर्चा
काँग्रेस आमदार फुटतील, असे सुरुवातीपासून बोलले जात होते. आपल्या उमेदवाराला दगाफटका होऊ नये त्यासाठी काँग्रेस पक्षाने डॉ. प्रज्ञा सातव यांच्यासाठी २७ मतांचा कोटा निश्चित केला होता. उरलेली मते शिवसेना ठाकरे गटाच्या मिलिंद नार्वेकर यांना देण्याचे पक्षाचे नियोजन होते. त्यामुळे डॉ. सातव पहिल्या फेरीतच विजयी झाल्या तर नार्वेकर यांना पहिल्या पसंतीची २२ मते मिळाली. सर्वपक्षीय नेत्यांशी मैत्रीपूर्ण संबंध असल्याने दुसऱ्या पसंतीची मते घेऊन ते विजयी झाले.पंकजा मुंडे यांच्या खांद्यावर ५ वर्षांनी गुलाल पडला, राजकीय वनवास अखेर संपला!
अजितदादांचे परफेक्ट नियोजन
भारतीय जनता पक्षाने काँग्रेसची फुटीर आणि छोट्या पक्षांची मते मिळवून उभे केलेल्या पाचही उमेदवारांना यशस्वीपणे निवडून आणले. अजित पवार यांच्या नेतृत्वाखालील राष्ट्रवादीकडे ४० मते होती. अजित पवार गटानेही काँग्रेसची काही मते आणि अपक्षांच्या मदतीने राजेश विटेकर आणि शिवाजीराव गर्जे यांना निवडून आणले.
११ जागा-१२ उमेदवार, त्यामुळे मते फुटणार हे निश्चित होतेच!
विधान परिषदेच्या ११ जागांसाठी १२ उमेदवार रिंगणात उतरल्याने निवडणुकीत काही मतांची फाटाफूट होईल, हे ठरलेले होतेच. भाजपकडून पाच, शिवसेनेकडून दोन आणि राष्ट्रवादी काँग्रेसकडून दोन असे एकूण ९ उमेदवार महायुतीकडून रिंगणात होते तर महाविकास आघाडीपैकी काँग्रेसकडून १, शिवसेना ठाकरे गटाकडून १ आणि शरद पवार गटाच्या पाठिंब्यावर उभे असलेले शेकाप नेते भाई जयंत पाटील असे एकूण ३ उमेदवार रिंगणात होते. ११ जागांसाठी १२ उमेदवार असल्याने पडणारा उमेदवार कोणता, याची गेली १० दिवस जोरदार चर्चा झाली.