‘कारगील युद्धात ज्या जवानांनी प्राणांची आहुती दिली, त्या हुतात्मा जवानांसाठी आरक्षित असलेल्या आदर्श सोसायटीत जे. एम. अभ्यंकर यांनी त्यावेळी सरकारी नोकरीत असताना स्वत:साठी फ्लॅट बुक केले. इतक्यावरच न थांबता अभ्यंकर यांनी स्वत:चे वेतन केवळ १५ हजार रुपये असे खोटे दाखवत ८० ते ९० लाखांचा फ्लॅट लाटला. याबाबत अभ्यंकर यांच्यावर गुन्हा दाखल होऊन सीबीआयकडून त्यांची चौकशी झाली होती,’ असे डॉ. वाघमारे यांनी सांगितले.
मुंबई बॉम्बस्फोटातील आरोपी मुसा हा उबाठाच्या उमेदवारांच्या प्रचारात पाकिस्तानी झेंडा नाचवत होता हे मुंबईकरांनी बघितले आहे. आता अभ्यंकरांच्या रूपाने थेट देशद्रोही माणसालाच उबाठाने शिक्षक मतदारसंघात उमेदवारी दिली आहे. अभ्यंकर यांचा इतिहास शिक्षकी पेशाला काळिमा फासणारा असल्याची टीका डॉ. वाघमारे यांनी केली. ते पुढे म्हणाले की, शिक्षण संचालक असताना अभ्यंकर यांनी शिक्षण सेवक पद निर्माण करणारा शासन निर्णय लागू केला होता. यात शिक्षण सेवकाला केवळ २५००, ३००० आणि ४००० रुपये वेतन देण्याची तरतूद करण्यात आली होती. शिक्षण देण्याचे पवित्र काम करताना अत्यल्प वेतनात काम करून शिक्षकांचे खच्चीकरण करण्याचे पाप अभ्यंकर यांनी केले. शिक्षकांचे सदैव नुकसान करणारे निर्णय घेणाऱ्या अभ्यंकर यांना मतदार नक्कीच जागा दाखवतील, असा विश्वास डॉ. वाघमारे यांनी व्यक्त केला.
‘शिक्षकांची पिळवणूक’
अभ्यंकरांच्या स्वत:च्या शिक्षण संस्था असून तेथे शिक्षकांना कर्मचाऱ्यांना कमी वेतनात राबवून घेतले जाते. वेतन वेळेवर दिले जात नाही. वेतनवाढीची मागणी केल्यास मारहाण केली जाते, असा गंभीर आरोपही डॉ. वाघमारे यांनी केला.