सागरी महामार्ग, नागपूर ते गोवा शक्तिपीठ महामार्ग, अशी स्वप्ने कोकणवासीयांना दाखवण्यात येत आहेत. कोकणातील पर्यटनातून कोट्यवधींच्या उलाढालीचे आडाखे बांधले जात आहेत, पण गेली १६ वर्षे एक मुंबई-गोवा महामार्ग सुरळीत सुरू करणे राज्य सरकारला जमलेले नाही. यंदाच्या पावसात तर खड्ड्यांतून प्रशासनाची नियोजनशून्यता समोर आली. पळस्पे ते इंदापूर रस्त्यावर अक्षरश: खड्ड्यांचे साम्राज्य पसरले आहे. नव्याने करण्यात आलेल्या काँक्रीटीकरणाचे पहिल्याच पावसात पितळ उघडे पडले. रस्त्यासोबत नव्याने बांधलेले उड्डाणपूलही खड्ड्यांत हरवले आहेत. लोणेरे येथे तर रस्ताच दिसेनासा झाला आहे. आता तेथे ‘पेव्हर ब्लॉक’ टाकण्याची शक्कल लढवली जात आहे. खड्ड्यांत आदळून रोज हजारो वाहनांचे मोठे नुकसान होत आहे. पाण्याच्या निचऱ्यासाठी योग्य नियोजन नसल्यामुळे रस्त्यावरील पाणी आता बाजूच्या गावांमध्ये शिरू लागले आहे. परशुराम घाटात रोज कोसळणाऱ्या दरडी सरकारी कामाच्या निष्क्रीयतेची साक्षच देत आहेत. खड्ड्यांचे साम्राज्य असलेल्या या महामार्गावरून रात्रीच्या वेळी प्रवास म्हणजे मृत्यूला निमंत्रण आहे. येथे दिशादर्शक नाहीत, वाहतूक पोलिसांचे मार्गदर्शनही नाही. त्यात अवजड वाहनांची वाढती संख्या, यामुळे रात्रीचा प्रवास टाळण्याच्या सूचना या भागातील रहिवासी करीत आहेत.
हजारो कोटी रुपये खर्च करूनही मुंबई-गोवा महामार्गाची अवस्था दिवसेंदिवस बिकटच होत आहे. लोकप्रतिनिधी, नेते केवळ एक दिवसाचा दौरा करण्यापलीकडे काहीच करत नसल्यामुळे त्यांच्यावरील कोकणवासीयांचा विश्वास आता उडाला आहे. मनसे अध्यक्ष राज ठाकरे यांनी निवडणुकीपूर्वी महामार्गाच्या दुरवस्थेविषयी केलेल्या घोषणा केवळ वल्गनाच ठरल्या. आम्हाला पूर्वीसारखा डांबरी रस्ता द्या, अशी विनवणी या महामार्गाच्या लगतच्या गावांमधून होत आहे. गणपतीसाठी गावाकडे जाण्याची तयारी करणाऱ्या लाखो कोकणवासीयांनीही महामार्गाच्या दुरवस्थेचा धसका घेतला आहे. उच्च न्यायालयात मुंबई-गोवा महामार्गाचे काम ३१ डिसेंबरपर्यंत पूर्ण करण्याचे आश्वासन राज्य सरकारने दिले आहे, पण महामार्गाची अवस्था पाहता हे आश्वासनही खड्ड्यांत जाण्याची चिन्हे अधिक दिसत आहेत.
रेल्वे प्रवासातही हाल
एकीकडे मुंबई-गोवा महामार्गाची दुरवस्था झाली असताना दुसरीकडे कोकण रेल्वेचे चित्रही दिवसेंदिवस बिकट होत आहे. सतत कोसळणाऱ्या दरडी, पावसात वाहून जाणारे रूळ, अशा वाढत्या घटनांमुळे कोकण रेल्वेवरील प्रवासही जीवघेणा झाला आहे. कोकण रेल्वेवरील ताण सतत वाढत आहे, पण यासाठी आवश्यक उपाययोजनांकडे होणाऱ्या दुर्लक्षामुळे कोकण रेल्वेचा सातत्याने खोळंबा होत आहे, याकडे तज्ज्ञ लक्ष वेधत आहेत.
Rain News: राज्यात मुसळधार पावसाची शक्यता, ऑरेंज अलर्ट जारी, २१ जुलैला महाराष्ट्रात कशी असेल हवामान स्थिती?
दुरुस्तीनंतरही घोडबंदर रोडवर खड्डे
ठाण्यातून बोरिवली आणि पालघरकडे जाण्यासाठी घोडबंदर रोडचा सर्वाधिक वापर केला जातो. पावसाळ्यापूर्वी या रस्त्याच्या दुरुस्तीकामांसाठी या भागातील अवजड वाहतूक बंद करण्यात आली होती, परंतु त्यानंतरच्या पावसाळ्याच्या पहिल्याच महिन्यात या भागातील रस्त्याच्या दोन्ही बाजूंना खड्डे पडले. त्यामुळे नागरिकांना प्रचंड मनस्ताप आणि वाहतूककोंडीचा सामना करावा लागत आहे. भाईंदरपाडा येथील एका खड्ड्यामध्ये वाहने जोरदार आदळत असल्यामुळे अपघाताचा धोका निर्माण झाला आहे. ठाणे महापालिका आयुक्त, वाहतूक पोलिस आणि अन्य प्राधिकरणांकडून सातत्याने रस्त्यावर उतरून खड्ड्यांवर उपाययोजना करण्याचे प्रयत्न केले जात असले, तरी अवघ्या काही दिवसांमध्ये पुन्हा खड्ड्यांमधून प्रवास करण्याची वेळ वाहनचालकांवर येत आहे.
मुंबई-नाशिक महामार्ग गैरसोयीचा
मुंबई-नाशिक महामार्गाच्या आठ पदरीकरणाचे काम काही वर्षांपासून सुरू आहे. या मार्गावर ठिकठिकाणी काँक्रीटची अर्धवट कामे पडून आहेत. परिणामी वाहनचालकांना मार्ग काढताना कसरत करावी लागते. विशेष म्हणजे, ठाण्यातून बाहेर पडल्यापासून वाहतूककोंडी सुरू होते. पुढे तीन ते चार तास वाहने रखडतात. भिवंडी आणि शहापूरच्या पुढेही सुट्टीच्या दिवशी चार-चार तास वाहनचालक अडकून पडत असल्यामुळे नागरिकांचा संताप दिवसेंदिवस वाढत आहे.
अतिरिक्त निधीची मागणी करणार
रायगडचे खासदार सुनील तटकरे यांनी या मार्गाच्या दुरवस्थेची पाहणी केली. यानंतर या महामार्गासाठी काही गोष्टींची आवश्यकता आहे. म्हणूनच अतिरिक्त निधीची मागणी केंद्रीय मंत्री नितीन गडकरी यांच्याकडे करणार आहे, असे त्यांनी सांगितले.