घाटकोपर येथील दुर्घटनेनंतर एकच गोंधळ उडाला. त्यानंतर महानगर पालिकेकडून संबंधित पडलेले होर्डिंग हे मध्य रेल्वेचे असून ते रेल्वेच्या हद्दीतील असल्याचे सांगण्यात आले. इतक नाही तर संबंधित होर्डिंगला लायसन्स नसून मुंबई महापालिकेने नोटीस बजावून हरकत घेतल्याचे म्हटले. हे होर्डिंग दिसावे म्हणून या हद्दीतील झाडांवर विषप्रयोग केल्याचे पालिकेने म्हटले आहे .
या प्रकरणी पालिका रेल्वे आणि होर्डिग कंपनीवर गुन्हा करणार असल्याचे बीएमसीने म्हटले आहे . आपत्ती व्यवस्थापन कायद्याअंतर्गत गुन्हा दाखल करणार असल्याचे पालिकेच्या जनसंपर्क अधिकाऱ्यांनी एएनआय वृत्तसंस्थेशी बोलताना सांगितले.
Ghatkopar Hoarding Collapse : घाटकोपर दुर्घटनेतील मृतांच्या नातेवाईकांना ५ लाखांची मदत, दोषींवर सदोष मनुष्यवधाचा गुन्हा दाखल
यासंदर्भातील एक्सवर एएनआय वृत्तसंस्थेकडून एक पोस्ट करण्यात आली आहे. त्यावर मध्य रेल्वेकडून उत्तर देण्यात आले आहे. ANIच्या पोस्टला उत्तर देताना रेल्वेकडून असा दावा करण्यात आला आहे की, संबंधित होर्डिंग रेल्वेच्या जागेवर नाही. त्याचा आणि भारतीय रेल्वेचा काहीही संबंध नाही.
मुख्यमंत्र्यांकडून दुर्घटनेतील मृतांच्या नातेवाईकांना ५ लाखांची मदत
घाटकोपर येथे होर्डिंग कोसळून झालेल्या दुर्घटनेच्या ठिकाणी मुख्यमंत्री एकनाथ शिंदे यांनी प्रत्यक्ष घटनास्थळी जाऊन पाहणी केली. या घटनेची चौकशी करून दोषींवर कारवाई केली जाईल. मुंबईतील अनधिकृत आणि धोकादायक होर्डिंगचे स्ट्रक्चरल ऑडिट करून अशी होर्डिंग्ज तात्काळ काढून टाकण्याचे निर्देश पालिका आयुक्तांना दिले असल्याचे त्यांनी सांगितले. तसेच शासनाच्या वतीने मृतांच्या नातेवाईकांना प्रत्येकी ५ लाख रुपयांची मदत दिली जाईल असे शिंदे यांनी स्पष्ट केले.या दुर्घटनेतील जखमींवर सरकारी खर्चाने उपचार करण्यात येतील तसेच आशा घटनेतील दोषींवर सदोष मनुष्यवधाचा गुन्हा दाखल करण्यात आला असून त्यांच्यावर कारवाई करण्यात येईल असेही मुख्यमंत्र्यांनी स्पष्ट केले. उपमुख्यमंत्री देवेंद्र फडणवीस यांनी देखील या घटनेची उच्चस्तरिय चौकशी करण्याचे आदेश दिल्याचे एक्स वरून सांगितले. तसेच जखमींना सर्वतोपरी सहाय्य करण्यात येईल असे त्यांनी यासंबंधित केलेल्या पोस्टमध्ये म्हटले आहे.