महाविकास आघाडीत सर्वाधिक जागा लढत असलेल्या शिवसेना उबाठानं भाजपवर निशाणा साधणारा व्हिडीओ एक्सवर शेअर केला आहे. ‘रोजगार पळवणाऱ्यांना आता द्या फेकून, आता हाती घ्या मशाल,’ अशी टॅगलाईन ठाकरेसेनेकडून वापरण्यात आली आहे. ४० सेकंदांच्या व्हिडीओमधून गुजरातला गेलेल्या कंपन्या आणि त्यामुळे तरुणांच्या हातून गेलेले रोजगार हे दोन मुद्दे अधोरेखित करण्यात आले आहेत.
‘त्या’ व्हिडीओमध्ये नेमकं काय?
ठाकरेसेनेनं शेअर केलेल्या व्हिडीओमध्ये एक तरुण सकाळच्या सुमारास बाकावर झोपलेला दिसतो. तिथे झाडलोड करणारा वयोवृद्ध कर्मचारी येतो. तो तरुणाला उठवतो. आपली बॅग आणि अन्य वस्तू चोरीला गेल्याचं तरुणाला जाग आल्यावर समजतं. माझी बॅग गेली कुठे, असा प्रश्न तरुण विचारतो. त्यावर कोणीतरी चोरली असावी, असं उत्तर सफाई कर्मचारी देतो.
तू रात्रभर बाकावर का झोपला होतास? असा प्रश्न सफाई कामगार विचारतो. तरुण शेजारीच असलेल्या एका कंपनीच्या गेटकडे बोट दाखवत इथे माझा इंटरव्ह्यू असल्यानं आलेलो, असं सांगतो. तितक्यात तरुणाला धक्काच बसतो. कारण कंपनी तिथे नसतेच. कंपनी गेली कुठे? असा प्रश्न तो विचारतो. त्यावर वयोवृद्ध सफाई कामगार ‘गुझर गयी रात, कंपनी गई गुजरात,’ असं उत्तर देतो. तरुणाचं लक्ष कंपनीच्या गेटकडे जातं. तिथे एक पाटी दिसते. ‘कंपनी गुजरात शिफ्ट झाली आहे,’ असा मजकूर त्या पाटीवर असतो.
गुजरातला गेलेली कंपनी आणि त्यामुळे हातून गेलेला रोजगार यामुळे तरुण संतापतो. ‘रोजगार पळवणाऱ्यांना आता द्या फेकून, आता हाती घ्या मशाल,’ अशा शब्दांमध्ये तरुण त्याचा संताप व्यक्त करतो. व्हिडीओच्या अखेरीस शिवसेनेचे संस्थापक बाळासाहेब ठाकरे, शिवसेना उबाठा प्रमुख उद्धव ठाकरे आणि आदित्य ठाकरेंचे फोटो दिसतात. याशिवाय ठाकरेसेनेचं चिन्ह असलेली मशालदेखील दिसते.