गुलटेकडी येथील पुणे कृषी उत्पन्न बाजार समितीमध्ये रविवारी राज्यासह परराज्यातून भाजीपाल्याची सुमारे ७५ ते ८० ट्रक आवक झाली. गेल्या आठवड्याच्या तुलनेत आवक घटल्याने आणि मागणी वाढल्याने भाज्यांचे दर वाढले आहेत.
घाऊक बाजारात कोथिंबीर, मेथी, कांदापात या भाज्यांची आवक कमी असल्याने दरात १५ ते २० टक्के वाढ झाली आहे. सोबतच सर्व पालेभाज्याही महागल्याचेही व्यापाऱ्यांनी सांगितले. कांदापातीचे दर ४० रुपयांवर गेले आहेत. अन्य पालेभाज्यांची गड्डी ३० रुपयांना उपलब्ध आहे. पुढील पंधरा दिवस पालेभाज्यांचे हेच दर कायम राहतील, असे विक्रेत्यांनी सांगितले. तरकारी विभागात रविवारी कोथिंबिरीची सुमारे एक लाख २५ हजरी जुडी आणि मेथीच्या ५० हजार जुडींची आवक झाली आहे.
डाळिंब, पपई, चिकूच्या दरात वाढ
फळबाजारात डाळिंब, पपई आणि चिकूच्या दरात वाढ झाली आहे. लिंबू, अननस, संत्री, मोसंबी, कलिंगड, खरबूज आणि पेरूचे दर स्थिर असल्याची माहिती व्यापाऱ्यांनी दिली़ रविवारी बाजारात मोसंबी ३० ते ४० टन, अननस सात ट्रक, संत्री १० ते १२ टन, डाळिंब ३० ते ३५ टन, पपई ३० ते ४० टेम्पो, लिंबांच्या सुमारे दीड ते दोन हजार गोणींची, कलिंगड १५ ते २० टेम्पो, खरबूज पाच ते सहा टेम्पो, चिकूची आठशे ते एक हजार गोणी आणि ३०० ते ४०० कॅरट पेरूची आवक झाली.
झेंडू महागला
गुलटेकडी येथील मार्केट यार्डात झेंडूची आवक घटली आहे़ पावसामुळे फुलांच्या दरात वाढ झाली आहे. फुलांचे प्रतिकिलोचे दर पुढीलप्रमाणे : झेंडू : ५०-९०, गुलछडी : ६०-१००, अ‍ॅस्टर : जुडी २०-४०, सुट्टा १००-१५०, शेवंती : ८०-१५०, (गड्डीचे भाव) गुलाबगड्डी : २०-२५, गुलछडी काडी : ३०-८०, डच गुलाब (२० नग) : ३०-८०, जर्बेरा : १०-३०, कार्नेशियन : १००-१५०, शेवंती काडी २५०-३००, लिलियम (१० काड्या) ८००-९००, ऑर्किड ४००-६००, जिप्सोफिला : १००-१५०, मोगरा : २००-३०० रुपये.
कडक उन; तसेच पावसामुळे फळभाज्यांचे मोठे नुकसान झाले आहे. नवीन लागवड पावसावर अवलंबून आहे. मागणीच्या तुलनेत फळभाज्यांची आवक कमी प्रमाणावर होत असल्याने दरांत मोठी वाढ झाली आहे.- प्रकाश ढमढेरे, भाजीपाला विक्रेते
पंधरा दिवसांपासून पालेभाज्यांची आवक कमी होत आहे. किरकोळ बाजारात कोथिंबिरीच्या आणि मेथीच्या एका जुडीचे दर ५० रुपयांवर गेले आहेत. बहुतांश पालेभाज्यांचे दर तेजीत असून, महिनाभर पालेभाज्यांचे हेच दर कायम राहतील.- राजेंद्र सूर्यवंशी, पालेभाजी व्यापारी