इलेक्ट्रिक लक्झरी स्पोर्ट्स सेडान – पोर्श टायकन ही एका बड्या बिल्डरचा मुलगा चालवत होता. जेव्हा अपघात घडला तेव्हा तो मद्यधुंद होता. त्याने मद्यधुंद अवस्थेत भरधाव वेगात पोर्शे कारने दुचाकीला धडक दिली. यामध्ये अश्विनी कोस्टा आणि अनिस अवधिया यांचा मृत्यू झाला.
महाराष्ट्राचे परिवहन आयुक्त विवेक भीमनवार यांनी दिलेल्या माहितीनुसार, पोर्शे कार मार्चमध्ये बेंगळुरू येथून एका डीलरने आयात केली होती. त्यानंतर नोंदणी प्रक्रिया पूर्ण करायची होती. नोंदणी प्रक्रिया पूर्ण करण्यासाठी हा पोर्शे कार पुणे आरटीओमध्ये आणली असता त्यासाठीचे नोंदणी शुल्क भरले नसल्याचे आढळून आले. पुढील प्रक्रिया पूर्ण करण्यासाठी कार मालकाला नोंदणी शुल्क जमा करण्यास सांगण्यात आले होते. मात्र, त्यानंतर ही गाडी कधी आरटीओमध्ये नोंदणीसाठी सादर करण्यात आलीच नाही.
लाखो किमतीच्या कारसाठी नोंदणी शुल्क फक्त १,७५८ रुपये?
अधिकाऱ्यांनी एका वृत्तसंस्थेला सांगितले की, महाराष्ट्रात नोंदणीकृत इलेक्ट्रिक वाहनांना रोड टॅक्समधून सूट देण्यात आली आहे. त्यामुळे, पोर्शे टायकन मॉडेल इलेक्ट्रिक कारचे नोंदणी शुल्क केवळ १७८५ रुपये होते. ज्यामध्ये १,५०० रुपये हायपोथेकेशन शुल्क, २०० रुपये स्मार्ट कार्ड आरसी शुल्क आणि ५८ रुपये टपाल शुल्क होते.
नोंदणीशिवाय गाडी रस्त्यावर कशी काढली?
अधिकाऱ्यांनी दिलेल्या माहितीनुसार, त्यांच्या नोंदीनुसार, कारकडे कर्नाटकने जारी केलेले वैध तात्पुरते नोंदणी प्रमाणपत्र होते. ज्याची वैधता मार्च ते सप्टेंबर २०२४ पर्यंत सहा महिन्यांची होती. बेंगळुरूमधील पोर्शे डीलरची चूक नव्हती, कारण त्यांनी तात्पुरती नोंदणी केल्यानंतर कार सुपूर्द केली होती. त्यामुळे रस्त्यावर वाहन चालवण्यापूर्वी त्याची आरटीओकडे नोंदणी करण्याची जबाबदारी मालकाची होती, जी त्यांनी केली नाही.