उद्धव ठाकरे-देवेंद्र फडणवीस एकाच लिफ्टमध्ये
विधिमंडळातील लिफ्टजवळ उद्धव ठाकरे आणि देवेंद्र फडणवीस येऊन थांबले. एकमेकांसमोर आल्यानंतर कोणीही कोणाला टाळलं नाही, उलट त्यांनी एकमेकांसोबत संवाद साधला. नक्कीच यावेळी फडणवीस आणि उद्धव ठाकरेंमध्ये फार चर्चा झाली नसली तरी त्यांनी एकमेकांकडे दुर्लक्षही केलं नसल्याचं दिसून आलं. शिवसेनेत फूट पडल्यानंतर उद्धव ठाकरे आणि फडणवीस एकमेकांवर सतत टीका करताना दिसून आले. त्यामुळे या दोन नेत्यांमध्ये कटुता निर्माण झाली होती. मात्र, त्यांची आजची समोरासमोर झालेली भेट पाहता ती कटुता आता कमी होतेय की काय असा प्रश्न उपस्थित होतो आहे. त्यांच्या या भेटीने महायुती आणि महाविकास आघाडीतील घटक पक्षांच्या नेत्यांच्या भुवया नक्की उंचावल्या असतील.
चंद्रकांत पाटील आणि उद्धव ठाकरे भेट
तर, तिकडे संसदीय कार्यमंत्री चंद्रकांत पाटील यांनीही विरोध पक्षनेत्यांची भेट घेतली. यावेळी ते विधानपरिषदेतील विरोध पनेते अंबादास दानवे यांच्या कार्यालयात आले होते. त्यावेळी तिथे उद्धव ठाकरे आणि अनिल परबही उपस्थित होते. यावेळी चंद्रकांत पाटलांनी विरोध पक्षनेत्यांना चॉकलेट दिले तर दानवेंनी चंद्रकांतदादांना पेढा दिला. यावेळी नेत्यांनी हसतखेळत एकमेकांशी संवाद साधला. तसेच, तुमचं असंच प्रेन कायम राहू द्या, असं उद्धव ठाकरे चंद्रकांतदादांना म्हणाले. त्यामुळे राजकीय वर्तुळात या भेटीची जोरदार चर्चा सुरु झाली.