विधानसभा निवडणुकीच्या तोंडावर भाजपचे अधिवेशन पुण्यातील श्री शिवछत्रपती क्रीडा संकुलात सुरू आहे. उपमुख्यमंत्री देवेंद्र फडणवीस, केंद्रीय मंत्री अश्विनी वैष्णव, केंद्रीय मंत्री पियुष गोयल, भाजपचे राष्ट्रीय सरचिटणीस विनोद तावडे तसेच महायुती सरकारमधील भाजपचे मंत्री, पदाधिकारी तसेच कार्यकर्ते उपस्थित आहेत. लोकसभा निवडणुकीत आलेले अपयश, तोंडावर असलेली विधानसभा निवडणूक तसेच मराराष्ट्रात गंभीर बनत चाललेला मराठा-ओबीसी आरक्षणाचा प्रश्न आदी मुद्द्यांवर फडणवीस यांनी भाष्य केले.
ओबीसी प्रवर्गातून मराठा आरक्षण द्यायला तुमचा पाठिंबा आहे का?
फडणवीस म्हणाले, मराठा आणि ओबीसी या दोन समाजांमध्ये भिंती निर्माण करण्याचे काम राज्यातील काही नेते करत आहेत. असे केले तरच आपण निवडणुका जिंकू शकतो, असे त्यांना वाटत असल्यानेत ते आरक्षणप्रश्नात पेट्रोल ओतण्याचे काम करत आहेत. एकतर विरोधक मराठा-ओबीसी आरक्षण प्रश्नावर नेमकी भूमिका स्पष्ट करत नाही. माझा प्रश्न मनोज जरांगे पाटील यांना नाही. माझा प्रश्न पवार-ठाकरे-पटोलेंना आहे की ओबीसी प्रवर्गातून मराठा आरक्षण द्यायला तुमचा पाठिंबा आहे का? असे विचारत फडणवीस यांनी मुद्द्याला हात घातला.
बारामतीतून ५ वाजता फोन गेला आणि विरोधकांनी बैठकीला दांडी मारली, छगन भुजबळांचा शरद पवार यांच्यावर गंभीर आरोप
शरद पवार राज्याचे चार वेळा मुख्यमंत्री राहिले, त्यांनी मराठा आरक्षण प्रश्न का सोडविला नाही
मराठा आरक्षणाचा लढा आज सुरु झालेला नसून अण्णासाहेब पाटील यांनी या लढ्याचे रणशिंग फुंकले. तत्कालिन काँग्रेस सरकारच्या मुख्यमंत्र्यांकडे त्यांनी मराठा आरक्षणाची मागणी केली, परंतु मराठ्यांना आरक्षणाची गरज नसल्याचे त्यांनी सांगितल्यावर अखेर अण्णासाहेबांनी स्वत:ला गोळी मारून आयुष्य संपविले. शरद पवार राज्याचे चार वेळा मुख्यमंत्री झाले. आता राज्य सरकारला आरक्षप्रश्नी लक्ष घालायाल लावणाऱ्या पवारसाहेबांनी त्यांच्या कार्यकाळात हा प्रश्न का सोडविला नाही? असा सवाल फडणवील यांनी विचारला.
१ लाख मराठा तरुणांना उद्योजक बनविले
त्याचवेळी मराठा समाजासाठी महायुती सरकारने केलेल्या कामांचा पाढाही फडणवीस यांनी वाचला. मराठा समाजाच्या तरुणांना उद्योजक बनविण्याचे काम सारथीने केले. जवळपास १ लाख तरुणांना सारथीच्या माध्यमातून कर्ज देऊन त्यांना व्यावसायिक बनविले. या सारथीची स्थापना विरोधकांनी केलेली नसून आपल्या सरकारने केल्याचे त्यांनी आवर्जून सांगितले.