दोन वर्षांपूर्वी झालेल्या विधान परिषद निवडणुकीत काँग्रेसची मते फुटली होती. मात्र, यावेळी सर्वच पक्षांना मतफुटीचा धोका संभवत आहे. त्यामुळे भाजपने आपल्या आमदारांना कुलाब्यातील प्रेसिडेंट हॉटेलमध्ये नजरकैदेत ठेवले आहे. शिवसेना (उद्धव बाळासाहेब ठाकरे) पक्षाने आपल्या आमदारांचा मुक्काम परळच्या आयटीसी हॉटेलमध्ये हलवला आहे. तर राष्ट्रवादी काँग्रेसचे आमदार सांताक्रुझ विमानतळाजवळच्या ललित हॉटेलमध्ये मुक्कामी आहेत. शिवसेनेचे सर्व आमदार हॉटेल ताज लॅण्ड एण्ड्समध्ये मुक्कामी आहेत.
पुरेपूर बंदोबस्त
राजकीय पक्षांनी आपले आमदार विरोधकांच्या गळाला लागू नयेत, यासाठी पुरेपूर बंदोबस्त केला असला तरी विविध क्लृप्त्या वापरताना आमदारांना संपर्क साधण्याची रणनीती क्षणाला बदलती ठेवण्यात आल्याचे समजते. तर यावर मात करण्यासाठी प्रत्यक्ष मतदानाच्या आधी आमदाराने कुणाला पहिल्या आणि कुणाला दुसऱ्या पसंतीचे मतदान करायचे, हे निश्चित केले जाणार आहे.
विधानसभेत भाजपचे १०३ आमदार असून छोटे पक्ष आणि अपक्ष उमेदवारांचा पाठिंबा आहे. त्यामुळे भाजपचे पाच उमेदवार निवडून येण्यात अडचण नाही. राष्ट्रवादी काँग्रेसचे ३८ आमदार असून या गटाला संजय शिंदे आणि देवेंद्र भुयार यांचा पाठिंबा आहे. शिवाय अजित पवार यांनी छोट्या पक्षांकडून शब्द घेतल्याचे समजते. शिवसेनेचे ३८ आमदार आहेत. तसेच काही अपक्ष आणि छोटे पक्ष शिंदे यांनी सोबत ठेवले आहेत. त्यामुळे शिंदे यांना दोन उमेदवार निवडून आणण्याचा विश्वास आहे. विधानसभेत काँग्रेसचे ३७ आमदार असले तरी चार ते पाच मते आपल्या उमेदवाराला मिळणार नाहीत, याची खात्री काँग्रेसला आहे. याशिवाय माजी मुख्यमंत्री अशोक चव्हाण समर्थक आमदारांच्या मताबाबत काँग्रेसला शंका आहे. त्यामुळे काँग्रेसने पहिल्या पसंतीचा २७ ते २८ मतांचा कोटा निश्चित केला आहे. तर उर्वरित मते नार्वेकर आणि जयंत पाटील यांच्याकडे फिरवली जाणार असून त्याचे नियोजन सुरू आहे.
Ajit Pawar : अजित पवारांकडे सहा मतांची तूट, पाडणार काँग्रेसमध्ये फूट; दादांना तिघांकडून मतदानाची हमी?
ठाकरेंची भिस्त काँग्रेसवर
उद्धव ठाकरे यांच्या पक्षाचे १५ आमदार असून नार्वेकर यांची भिस्त काँग्रेस आणि शिवसेना तसेच अपक्ष आमदारांवर आहे. जयंत पाटील यांना राष्ट्रवादी काँग्रेस शरद पवार यांच्या १२ आमदारांचा पाठिंबा आहे. तसेच खुद्द शरद पवार हे जयंत पाटील यांच्यासाठी मतांची जुळवाजुळव करत आहेत. बहुजन विकास आघाडी आणि अजित पवार पक्षाची काही मते जयंत पाटील यांच्या पारड्यात कशी पडतील, याचा प्रयत्न शरद पवारांकडून सुरू असल्याचे समजते. पहिल्या पसंतीप्रमाणे दुसऱ्या पसंतीच्या मतासाठीही उमेदवारांची धावाधाव सुरू आहे. त्यामुळे या निवडणूक निकालाची उत्कंठा वाढली आहे.
पवार विरुद्ध पवार?
विधान परिषद निवडणुकीत राष्ट्रवादी काँग्रेस शरदचंद्र पवार पक्षाचे सर्वेसर्वा शरद पवार यांनी आपले पाठबळ जयंत प्रभाकर पाटील यांच्यामागे उभे केल्याने शरद पवार विरुद्ध अजित पवार असे वळण घेतल्याची चर्चा आहे. लोकसभा निवडणुकीतील पराभवाने अजित पवार यांच्या आमदारांमध्ये अस्वस्थता आहे. ही अस्वस्थता हेरून त्यांना गळाला लावण्याचे शरद पवार यांचे प्रयत्न आहेत. अजित पवार यांच्या पक्षाचे आमदार संपर्कात असल्याचा दावा शरद पवार यांच्या पक्षाकडून सातत्याने केला जात आहे. या निवडणुकीत हा दावा फोल ठरावा आणि आपले आमदार फुटू नयेत यासाठी राष्ट्रवादी सावध आहे.
विधान परिषद निवडणुकीतील उमेदवार
भाजप : पंकजा मुंडे, योगेश टिळेकर, परिणय फुके,अमित गोरखे आणि सदाभाऊ खोत.
शिवसेना : भावना गवळी आणि कृपाल तुमाने
राष्ट्रवादी गट : राजेश विटेकर आणि शिवाजी गर्जे
काँग्रेस: डॉ. प्रज्ञा सातव
शिवसेना (उद्धव बाळासाहेब ठाकरे) : मिलिंद नार्वेकर
राष्ट्रवादी काँग्रेस शरदचंद्र पवार पुरस्कृत : जयंत पाटील.
विधानसभेतील बलाबल पुढीलप्रमाणे
भाजप – १०३, शिवसेना शिंदे गट- ३८, राष्ट्रवादी अजित पवार गट – ४०, काँग्रेस – ३७, शिवसेना उद्धव ठाकरे गट – १५, राष्ट्रवादी शरद पवार गट – १२, बहुजन विकास आघाडी – ३, समाजवादी पक्ष – २, एमआयएम – २, प्रहार जनशक्ति – २, मनसे – १, माकप – १, शेकाप – १, स्वाभिमानी पक्ष – १, रासप – १, जनसुराज्य शक्ती – १ , क्रांतिकारी शेतकरी पक्ष – १, अपक्ष – १३.
एकूण २७४
काँग्रेसचा व्हीप जारी
विधान परिषद निवडणुकीच्या पार्श्वभूमीवर काँग्रेसने गुरुवारी आपल्या विधानसभेतील सर्व आमदारांसाठी व्हीप जारी केला. विधिमंडळ पक्षाचे नेते बाळासाहेब थोरात यांच्या सहीने हा व्हीप काढण्यात आला आहे. पक्षाच्या आमदारांनी विधान परिषद निवडणुकीच्या मतदानात सहभागी होणे अनिवार्य असून त्यांनी पक्षाच्या आदेशानुसार मतदान करावे, असे व्हिपमध्ये नमूद करण्यात आले आहे.