‘पोर्श’ कार भरधाव चालवून तरुण-तरुणीच्या अपघाती मृत्यूस कारणीभूत ठरलेल्या अल्पवयीन मुलाला वाचविण्यासाठी रक्ताचे नमुने बदलण्याचा प्रताप केल्याप्रकरणी ससून रुग्णालयातील न्यायवैद्यक शास्त्र विभागाचे (फॉरेन्सिक डिपार्टमेंट ) प्रमुख डॉ. अजय तावरे, आपत्कालीन विभागाचे मुख्य वैद्यकीय अधिकारी डॉ. श्रीहरी हाळनोर आणि शवविच्छेदन विभागातील शिपाई अतुल नामदेव घटकांबळे यांना अटक करण्यात आली आहे. त्यांच्याविरोधात भ्रष्टाचार प्रतिबंधक कायद्यानुसार गुन्हा दाखल करण्यात आल्याने त्यांना लाचलुचपत प्रतिबंधक कायद्याच्या विशेष न्यायालयात हजर करण्यात आले.
अल्पवयीन मुलाच्या रक्ताचे नमुने घेतलेल्या ठिकाणचा पोलिसांनी पंचनामा केला असून, तिथे ‘सीसीटीव्ही’च नाही. आसपासच्या ‘सीसीटीव्ही’त हाळनोर आणि घटकांबळे यांच्यासह काही साक्षीदार दिसून आले आहेत. या प्रक्रियेदरम्यान डॉ. तावरे, डॉ. हाळनोर आणि घटकांबळे यांच्यात व्हॉट्सअॅप व समाजमाध्यमातून संवाद झाला असून, इतर संशयितांसोबत आर्थिक देवाणघेवाण झाली आहे, असे तपास अधिकाऱ्यांनी न्यायालयात सांगितले.
अल्पवयीन मुलाच्या रक्ताचे नमुने बदलण्यासाठी डॉ. हाळनोर याने घेतलेले अडीच लाख रुपये व घटकांबळे याने घेतलेले पन्नास हजार रुपये, तसेच रुग्णालयातील ‘सीसीटीव्ही’ चित्रीकरण पोलिसांनी जप्त केले आहे. दोन्ही डॉक्टर, शिपाई व विशाल अगरवाल यांच्यामध्ये दूरध्वनीवरून बोलणे झाले असून, त्यांची एकत्रित चौकशी करायची आहे, तसेच आरोपींच्या घरांची झडती घ्यायची आहे, असे न्यायालयास सांगण्यात आले. आरोपींची पोलिस कोठडी वाढविण्यासाठी पोलिसांनी दिलेली कारणे जुनीच असून, सर्व आरोपी पोलिसांच्याच ताब्यात असल्याने ते एकत्रित तपास करू शकले असते. आरोपींकडून कोणतीही जप्ती, वसुली बाकी नाही. केवळ कलमवाढ केल्याने पोलिस कोठडी वाढविता येणार नाही, असा बचाव आरोपींच्या वकिलांनी केला.
Sangli Accident : आई, वडील, ताई आणि तीन लेकरं; कुटुंबीयांच्या ६ मृतदेहांसह जखमी स्वप्नालीने अख्खी रात्र काढलीRead Latest Maharashtra News Updates And Marathi News
कोठडीत ५ जूनपर्यंत वाढ
कारचालक अल्पवयीन मुलाला वाचविण्यासाठी त्याच्या रक्ताचा नमुना बदलून पुरावा नष्ट केल्याप्रकरणी डॉ. अजय तावरे, डॉ. श्रीहरी हाळनोर आणि अतुल घटकांबळे यांच्या पोलिस कोठडीत न्यायालयाने ५ जूनपर्यंत वाढ केली आहे.